Deputadu José Vergilio hatete, implementa sekra sanitária covid-19 fó alarma katak labele halibur ema, maibé governu haruka PNTL kaptura sidadaun kuaze 200 resin hodi bou hamutuk iha komandu Munisípiu Dili.

“Governu mak hakarak halo duni moras ida ne'e, governu mak inventa duni moras ida ne'e para moras ida ne'e mosu barak liután iha Timor laran”, afirma nia iha plenária Parlamentu Nasionál (PN), tersa (16/03).

Maiske, governu liuhusi konselhu ministru deside taka loja no atividade barak-barak maibé , akontese polísia sira kaer joven sira ne'ebe hala'o ezersisiu ba sira-nia saúde.

Tuir regra saúde nian, lolos ema sira bele hala'o ezersisiu maibé tenke uza nafatin máskra, distansiamentu sosiál, inklui regra sira seluk.

“Nusa governu la tau dehan, haruka atu fó nafatin regra sira husi saúde nian nafatin, esplika didi’ak ba ita-nia povu sira tenke uza máskra, labele ba kaer tau hamutuk povu sira, ita-nia joven sira ba hamutuk iha ne'eba”, lamenta nia.

Maibé nia parte sente la kompriende regra saída mak ida ne'e, tanba ko’alia kona-ba regra, governu rasik la kumpre regra.

Xefe bankada Kmanek Haburas Unidade Nasional Timor Oan (KHUNTO), deputada Olinda Guteres hatete, nia parte apresia servisu operasaun ka patrollamentu ne’ebé Komandu PNTL hala'o iha Munisípiu Dili hodi evita Covid-19 iha rai laran.

Husu ba governu ne'ebe lideradu husi primeiru ministru Taur Matan Ruak atu fó apoiu subsidiu ba pesoál PNTL sira ne’ebé sakrifika-an hala’o servisu iha liña oin (frontline).(*)