Tanba serka sanitária no konfinamentu obrigatóriu ba Munisípiu Baukau no Vikeke hahú aplika iha loron 15 to’o loron 29 fulan-marsu tinan 2021, enkuantu ba Munisípiu Dili rasik kontinua extende hahú loron 15 fulan-marsu to’o loron 2 fulan-abril tinan 2021.
Ministru Prezidente Konsellu Ministru, Fidélis Mangalhaes hatete, governu deside aplika serka sanitária no konfinamentu obrigatóriu ba Munisípiu Baukau no Vikeke hafoin deteta kazu pozitivu.
Implentasaun Serka sanitária no konfinamentu obrigatoriu ba Munisípiu rua kuaze hanesan ho Munisípiu Dili, tamba la autoriza komunidade atu halo movimentu bainhira laiha nesesidade urjénsia, no autoriza deit loja ne'ebé faan nesesidade baziku.
"Munisípiu hirak ne'e mak, Munisípiu Baukau no Munisípiu Vikeke”, deklara Fidelis iha edifisiu Ministeiru Finansas Aitarak-laran Dili, segunda (15/03).
Maske nune’e, governu autoriza populasaun hosi Munisípiu Lautein bele hakat liu Baukau bainhira iha atividade importante ne'ebé sei halo iha Dili.
"Munisípiu Baukau sei loke de’it koridor ba nesesidade urjente ba populasaun Lospalos, se sira presiza duni mai hakat liuhosi Munisípiu Baukau sei iha koridor ida iha ne'ebá maibé ho rekezitu ida katak sira ne'ebé passa iha Baukau la autori fó volta, hán ka tur iha Baukau”, esplika Fidelis.
Serka sanitária ne'ebé aplika ba Munisípiu tolu hanesan Dili, Baukau no Vikeke rasik la autoriza atu komunidade hakat liu área jurídika Munisípiu tolu nian, no bainhira iha atividade urjensia hanesan transporta moras ka presiza ai-hán nesesidade baziku presiza autorizasaun hosi Diretór SIJK.
Haree ba dadus Covid-19 ne’ebé fó sai husi Munisípiu Bauacau iha kazu pozitivu na’in-7 no iha Munisípiu Vikeke rasik deteta kazu pozitivu na’in-1.(*)