Nia dehan, kona-ba osan, daudaun ne'e standby hela iha sistema Ministériu Finansas (MF) nian, tanba ne'e hein de'it ministériu implementadór sira atu aserta ninia prosesu administrativu sira hodi haruka ba finansa nune'e atu bele halo pagamentu ona.

"Ha'u hein katak, sira bele rezolve ona iha semana ne'e nia laran. Pagamentu sira prosesa ona, semana ne'e bele ona", tenik Koordenadór Asuntu Ekonómiku (MKAE), Joaquim Amaral hafoin reuniaun Konsellu Ministru (KM) extraordináriu iha Ministériu Finansas (FM), Ai-tarak Laran, segunda (15/03).

Bainhira husu kona-ba dadus husi Sekretária Estadu Kooperativa (SEKOOP) nian ne'ebé molok ne'e mós dehan haruka ba MF, Ministru Joaquim hatete, sira seidauk hatama iha sistema finansa nian, tanba ne'e nia nafatin husu ba ministériu implementadór sira atu halo koordenasaun imtensivu ho MF hodi prosesa pagamentu ba kompañia sira.

"Seidauk iha sistema, ohin ha'u husu fali ba sira, para sira konserta didi'ak ho finansa atu bele halo pagamentu. Agora, finansa standby, hein katak ministériu implementadór sira halo koordenasaun intensivu liután ho finansa atubele aselera prosesu pagamentu, tanba kompañia sira, hanoin sira merese hetan pagamentu lais", hatete Ministru Joaquim Amaral.

Entretantu, kompañia sira ne'ebé halo distribuisaun ai-haan Cesta Bázika hamutuk ho ministériu implementadór SEKOOP, sira termina ona distribuisaun iha munisipiu Kovalima dezde fulan dezembru tinan 2020 kotuk, balu sei kontinua la'o hela, balu hotu besik atu hotu ona, maibé to'o oras ne'e governu seidauk nafatin pagamentu.(*)