Print this page

KM Deside Serka Sanitária Iha Munisípiu Baucau-Viqueque

Ministru Prezidenti Konsellu Ministru, Fidelis Mangalhaes ko'alia ba Midia hafoin remata KM extraordinaria iha Ministeiru Finansas Ai Tarak Laran, Segunda (15/3) Ministru Prezidenti Konsellu Ministru, Fidelis Mangalhaes ko'alia ba Midia hafoin remata KM extraordinaria iha Ministeiru Finansas Ai Tarak Laran, Segunda (15/3) Foto Gabinete PM

Tempotimor (Dili) - Governu liuhosi reuniaun konsellu ministru deside aplika serka sanitária ba Munisipiu Baucau no Viqueque relasiona ho kazu suspeitu covid-19 ne'ebé rejista iha ponta leste.

Ministru Prezidenti Konsellu Ministru, Fidelis Mangalhaes hatete, governu deside aplika serka sanitária no konfinamentu obrigatoriu ba Munisípiu rua hanesan Baucau no Viqueque hafoin deteta kazu pozitivu iha Munisípiu rua refere.

Fidelis hatutan, kona-bá medidas ka implentasaun Serka sanitária no konfinamentu obrigatoriu ba Munisípiu rua kuaze hanesan ho Munisípiu Dili, katak la autoriza komunidade atu halo movimentu bainhira laiha nesesidade urjensia, alende ne'e autoriza deit loja ne'ebé faan nesesidade baziku mak halo aktividade.

"Munisípiu hirak ne'e mak, Munisípiu Baucau no Munisípiu Viqueque," dehan Fidelis iha edifisiu Ministeiru Finansas Aitarak-laran Dili, Segunda (15/03).

Fidelis afirma, Munisípiu rua refere sei aplikasi konfinamentu obrigatoriu katak hela iha uma labele sai, no serka sanitária katak Munisípiu rua ne'e sei la hakat sai hosi area juridiku.

Alende ne'e, governu autoriza atu populasaun hosi Munisípiu Lospalos-Lautem bele hakat liu Baucau bainhira iha aktividade inportante ne'ebé sei halo iha Dili maibe sei la halo movimentu iha Baucau.

"Munisípiu Baucau sei loke deit koridor ba nesesidade urjentu ba populasaun lospalos, se sira presija duni mai hakat liuhosi Munisípiu Baucau sei iha koridor ida iha ne'ebá maibe ho rekezitus ida katak sira ne'ebé passa iha baucau la autorijadu fo volta, han ou tur iha Baucau," dehan Fidelis

Serka sanitária ne'ebé aplika ba Munisípiu tolu hanesan Dili, Baucau no Viqueque rasik la autoriza atu komunidade hakat liu area jurídika Munisípiu tolu nian, no bainhira iha aktividade urjensia hanesan transporta moras ou presija aihan nesesidade baziku presija autorizasaun hosi Diretor SIJK.

Entertantu implentasaun serka sanitária no konfinamentu obrigatoriu ba Munisípiu Baucau no Viqueque rasik sei aplika hahu ohin no sei remata iha 29 Marsu 2021, enkuantu ba Munisípiu Dili rasik kontinua extende hahu ohin no sei remata iha loron 02 fulan April 2021.

Dadaun ne'e Covid-19 hahu invade Munisípiu Bauacau hafoin rejista kazu pozitivu nain 7 no iha Munisipiu Viqueque rasik deteta kazu pozitivu nain 1.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items