Deklarasaun ne’e fó sai husi deputadu UDT bazeia ba gravasaun ne’ebé hato'o husi povu Ermera, katak sira lamenta tebes ho distribuisaun hahan sesta bazika no deskonfia militante sira husi partidu Fretilin de’it mak hetan.
“Husu ba governu atu halo investigasaun sobre kompañia ida ne’ebé sai fali parseiru polítiku ba partidu ida nian, tanba ha’u fiar katak partidu mós la fó orientasaun ba kompaña sira atu halo buat sira hanesan ne'e”, dehan nia iha sesaun plenáriu Parlamrntu Nasionál (PN), segunda (08/03).
Tanba ne’e, husu atu defende povu, maibé labele esplora povu, labele halo deskriminasaun fali ba povu, iha situasaun polítika ne'ebé ultrapasa, tanba povu mak deputadu sira iha PN.
Tuir gravasaun ne’ebé xefe bankada UDT ne'e fó sai, katak, “Agora sira ne’ebé husi Fretilin, sira simu hotu ona, maibé agora sira ne’ebé mak husi partidu CNRT, PLP, inklui partidu sira seluk, to'o agora ami nu’uka simu, evidénsia iha duni tanba sira lori mai fahe de'it ba militante Fretilin nian simu hotu, depois ami sira seluk hein-hein to'o agora balun to'o fulan tiha ona mós seidauk simu”.
Maibé, Deputadu Bankada Fretilin, David Dias Ximenes Mandati, husu ba deputadu bankada UDT atu fó sai dadus karik deklara mós suku ida ne'ebé mak enfrenta problema ne’e.
"Ohin dehan Fretilin mak fahe buat ne'e lalos, ne'ebé husu ba deputadu bankada UDT atu fó sai suku ida ne'ebé los mak halo ida ne'e”, dehan nia.(*)