Ba kestaun ne'e, Prezidente Parlamentu Nasionál (PPN), deputadu Aniceto Longuinhos Guterres Lopes hatete, dadauk ne'e, meza enkamina ona ofísiu ida ba komisaun A, ne'ebé trata asuntu justisa no konstitusionál PN, atu halo pareser kona-bá problema deputadu falta loron-lima tutuir malu, iha debate OJE 2021.
Tanba tuir nia, iha artigu 7, husi rejimentu parlamentu nian, hatete deputadu sira bele lakon mandatu, wainhira sira falta loron lima tutuir malu, iha debate plenáriu.
"Ha'u haruka tiha ofísiu ida ba komisaun A atu hetan pareser kona-bá asuntu ida ne'e, tanba deputadu balun reklama, se sira la tuir debate Orsamentu Jerál Estadu, tuir rejimentu kuandu falta loron lima tutuir malu, ne'e bele lakon ou perde mandatu," dehan nia, iha PN, sesta (5/3).
Kona-bá desizaun halakon mandatu deputadu CNRT 21 ne'e, PPN Aniceto hatete, nia parte seidauk bele komenta, maibé hein de'it rezultadu husi pareser komisaun A nian, tanba kestaun ida ne'e, sira submete ona ba komisaun A mak halo pareser.
"Mais ida ne'e atu konsidera hanesan falta ou hanesan polítika ida, bele dehan walk out ida, Desizaun la'os prezidente mak hola, desizaun ne'e iha plenáriu, tanba iha ne'ebá, sei halo leitura, ne'ebé nia kontiudu no sentidu ne'e sei segredu parlamentu nain," hatete nia.
Nudar orgaun lejisdór, PPN haruka hodi levanta kestaun ida ne'e, la'os tanba meza mak la konkorda maibé, tanba rona deputadu sira kestiona hanesan ne'e, i meza prontu haruka ofísiu ba komisaun A, hodi fó apresiasun ba asuntu ne'e.
"Agora pareser iha tiha ona ha'u nia meza, ha'u sei lori ba konferénsia líder bankadas, para atu submete ba plenáriu ka halo nusa," tenik nia.(*)