Tuir Prezidente Parlamentu Nasionál (PPN) Aniceto Longuinhos Guteres Lopes, iha 4 Marsu, Parlamentu Nasionál simu akordaun husi tribunál ninian kona-ba rezeita pedidu deklarasaun inkonstituisionalidade ho konstituisionalidade OJE 2021 ne’ebé deputadu bankada CNRT submete ba tibunál.
"Desizaun maka tribunál rezeita hotu sira-nia pedidu deklarasaun ne'e. pedidu bankada CNRT nian dahuluk maka kestiona kona-ba verba ida atu halo hotu konstrusaun Ró Ferry Haksolok ne'e dehan inkonstituisional, maibé tribunál la deklara inkonstituisional,” dehan Aniceito iha PN, Sesta (5/3).
PPN ne’e afirma, pontu seluk husi pedidu CNRT nian mak husu tribunal atu deklara ilegál ba OJE 2021, maibé tribunál rezeita pedidu CNRT nian.
“Asuntu sira seluk kona-ba ilegalidade, ne'ebé ke sira dehan orsamentu ne'e kontra lei Orsamentu Jestaun Finanseira (OJF), numeru 9/2013 no sira husu atu tribunál deklara ilegál, maibé tribunál rezeita atu deklara ilegalidade," dehan Nia.
Aniceto afirma, pedidu deklarasun inkonstituisional no ilelegalidade ne’ebé bankada CNRT hato'o ba TR ne'e hamutuk neen, maibé tribunál rezeita tanba konsidera halo fali julgamentu ba buat ne’ebé inprosedente.
Bazeia ba desizaun Tribunál Rekursu nian, maka PPN sei distribui mós akordaun husi tribunál nian ne'e ba bankada parlamentares ida-idak para hatutan informasaun ba ninia deputadu sira hotu hodi akompaña pozisaun TR ba OJE 2021.(*)