Keixa ba MAPKomS ho KI la ‘puas’, Sico-Gari Ameasa-tan Tempotimor

kopia karta Prezidente RTTL.EP ne'ebe curhat ba MAPKoms no KI kona ba notisia www.tempotimor.com, Kinta (4/3) kopia karta Prezidente RTTL.EP ne'ebe curhat ba MAPKoms no KI kona ba notisia www.tempotimor.com, Kinta (4/3) Foto Tempo Timor

Tempotimor (Dili)-Prezidente Rádiu Televizaun Timor-Leste, Empreza Públika (RTTL, E.P), Francisco da Silva Gari (Sico-Gari), hato’o ona keixa ba Ministru Asuntu Parlamentares no Komunikasaun Sosiál (MAPKOSM), Francisco da Costa Perreira Jerónimo no mós Prezidente Konsellu Imprensa (KI), Virgílio da Silva Guterres liuhusi karta formál.

Karta keixa ne’e ho konteúdu ‘curhat’ katak, notísia hosi média online www.tempotimor.com halo defamasaun ba Sico-Gari nu’udár líder másimu ka Prezidente iha instituisaun komunikasaun sosiál públika ne’e, dalarua ona.

“Produtu jornalístiku sira husi média Tempotimor vióla lei Komunikasaun Sosiál,” Sico Gari hateten liuhusi karta ne’ebé haruka ba diresaun www.tempotimor.com , MAPKOMS no KI iha kinta (4/3).

Iha karta ne’e sita notísia ne'ebé www.tempotimor.com publika iha loron 8 fulan Dezembru tinan 2020 ho títulu "Funsionáriu RTTL, EP husu MAPKOMS troka Prezidente Sico Gari", no iha loron 23 fulan Fevereiru tinan 2021 ho títulu "Tatoli I.P Loke Vaga, RTTL, E.P koko tebe sai nia Jornalísta ida".

Iha karta ne’e Sico Gari espresa ninia sentimentu katak, títulu notísia rua ne’e, www.tempotimor.com la konsidera artigu 4, aliña a), husi lei Komunikasaun Sosial ne'ebé dehan ‘órgaun komunikasaun sosial sira iha dever hodi komprova verasidade husi informasaun ne'ebé nia simu, rekorre, sempre posível, fontes oioin, hodi garante pluralidade husi versaun sira".

“Lamentasaun boot tebes ba prátika jornalísta husi www.tempotimor.com ne'ebé la fó konsiderasaun ba lei no étika sira ne'ebé aplika hodi prejudika reputasaun RTTL, E.P nian,” haktuir paragrafu ida husi karta ne’e.
Liuhusi karta ida ne'e, Sico-Gari ameasa no hakarak informa ba diretór www.tempotimor.com hodi konsidera lamentasaun ida ne'e, atu ba oin laiha tan produtu jornalístiku ne’ebé la halo tuir lei no étika jornalísta nian.

Bainhira iha tan publikasaun ho karáter hanesan, nia dehan, hanesan Prezidente RTTL, E.P ne’ebé hetan pose husi MAPKOMS, sei lori kazu ne'e ba oin, hodi husu responsábilidade www.tempotimor.com.

Sico Gari mós konsidera informasaun ne'ebé publika husi www.tempotimor.com, nu’udár produtu jornalístiku ida ne'ebé laiha responsábilidade, tanba hatun informasaun ne'ebé laiha konfirmasaun ka opiniaun kontrapartida husi RTTL, E.P ne'ebé sai alvu ba notísia ne’e.

Iha konteúdu karta ne'e mós haktuir tan katak, aktu husi média www.tempotimor.com nu'udár erru ida gráve tebes ba lala'ok órgaun komunikasaun sosial ida ne'ebé dezvaloriza no dezrespeita lei no étika hirak ne'ebé regula kona-ba produtu jornalízmu nian, no liu-liu prejudika tebes reputasaun RTTL, E.P nian, iha kontestu Prezidente ne’ebé hanesan líder aas liu iha instituisaun ne’e.

Ba kestaun ne'e, diretór www.tempotimor.com, José António Belo husu ba Konsellu Imprensa (KI) no MAPKOMS atu halo investigasaun klean ba kazu ne'e.

Nia konsidera preokupasaun Prezidente RTTL.EP ne’e pertinente maski la hatudu faktus konkretu atu justifika erru ne’ebé www.tempotimor.com komete.

Tanba ne’e, José Belo dehan, www.tempotimor.com prontu kualkér tempu atu hatan iha Tribunál hodi responsabiliza publikasaun ne’ebé prezudika tebes na’i Prezidente RTTL.EP ninia reputasaun.

“Importante mak tenke iha faktus ruma ne’ebé justifika katak, ami nia publikasaun ne’e kontra kódigu étika jornalista Timor Leste nian no mós Lei Komunikasaun Sosiál nian. Tanba ami nia publikasaun sira sempre tuir faktus,”José António Belo hateten.

Nia mós halo liu tan autodefeza katak, iha loron 8 dezembru 2020, www.tempotimor.com publika duni notísia kona-bá Funsionáriu RTTL.EP Husu MAPKOMS Troka “Prezidente Sico Gari”.

Publikasaun ne’e www.tempotimor.com la inventa tanba funsionáriu na’in rua mak eziji duni ba MAPKOMS Francisco Jeronimo atu "troka" Prezidente RTTL.EP Francisco da Silva Gari (Sico Gari), durante enkontru ho ho funsionáriu na’in 197, iha Salaun Ministériu Transporte no Komunikasaun, Caicoli (8/12).

Kona ba notisia ho títulu "Tatoli I.P Loke Vaga, RTTL, E.P koko tebe sai nia Jornalísta ida" katak notisia refere haltuir karta ida husi ulun bo'ot RTTL.ep ne'ebe koko hasai jornalista ida mak haknark a'an iha instituisaun refere tan ba antes ne'e jornalista refere konkore mos ba vaga ne'ebe loke husi Tatoli I.P.

José Belo temi katak, notisia ne’ebé iha ne'e bazea ba enkontru evaluasaun iha ne'ebe iha prezensa husi MAPKomS ho Prezidente RTTL.ep, Jornalista Nuno Saldanha mak husu governu liu husi Ministériu Asuntu Parlamentár no Komunikasaun Sosiál presiza hare kestaun estrutura RTTL. EP nian, tanba konsidera durante ne'e halo diskriminasaun inklui la halo survei ba instituisaun.

Alende ne’e, funsionariu seluk ne’ebé ko'alia iha enkontru ne’e mak hanesan Jornalista Aveiro Ximenes katak, nia parte akompaña hela, durante ne'e servisu sira iha RTTL.EP kahur barak liu ho asuntu no interese partidu politiku nian, tanba ne'e husu ba ezekutivu ne’ebé instituisaun ne’e tetela ba presiza toma atensaun sériu.

Ikus liu José Belo fó hanoin katak, bainhira laiha fundamentu ruma, diak liu Prezidente RTTL.EP buka aprende barak liutan kona-ba jornalizmu no tenke hakaas aan atu kompriende kódigu etika jornalista Timor-Leste nian, tanba servisu ne’ebé www.tempotimor.com pratika daudaun hala’o hela serbisu jornalizmu. (*)

Rate this item
(2 votes)
Last modified on Friday, 05 March 2021 22:35
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« October 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter