Sekretária Jerál Organizasaun Popular Mulheres Timorense, Florentina Smith, hateten, ohin loron 3 fulan marsu, hanesan loron Nasionál Veteranu nian tan ne'e iha oportunidade ida ne'e Veterana Timor-Leste hahú halo lansamentu ba livru ho títlu “Buibere Hamriik Tuba Rai Metin Ukun Rasik An”.

“Ita haree katak loron ida-ne'ebé importante tebes, ami hanesan organizasaun istórika hamutuk ho komisaun peskiza elaborasaun istoria, ami hanoin katak pelumenus prienxe netik atividade ruma iha loron espesiál ida-ne'e,” dehan nia hafoin partisipa iha selebra loron nasionál veteranu nian iha salaun Muzeu Rezisténsia, kuarta (3/3).

Nia dehan, ema hotu hatene katak livru ‘Buibere Hamriik Tuba Rai Ukun Rasik An’ nu’udar livru ida-ne'ebé ko'alia kona-bá istoria feto Timor nian, istória feto sira-ne'ebé durante ne'e fó sira-nia kontribuisaun, fó sira-nia aan tomak ba mate, balun moris, balun faluk hodi husik mós ba jerasaun foun sira istoria.

Veterana ne'e relata, husi livru sira-ne'e katak mais kompletu, signifika katak livru ida-ne'e kona-ba feto Timor-Leste nian, la'ós ko'alia de'it kona-ba feto sira iha organizasaun iha Timor, maibe ko'alia mós kona-ba feto mia partisipasaun iha 1974 to'o 1999 inklui bazea de apoiu.

“Ami hanoin livru ida ne'e ko'alia istória naruk ida hahu feto nia moris, feto nia sistema partiliniar ne'ebé durante hasoru, konta mós istoria ruma feto nian hahu joven iha 1974 to'o iha 1999,” haktuir nia.

Nia salenta, istória ida ne'e haree katak feto nia kontribuisaun iha prosesu funu luta ba ukun rasik-aan.

“Ami La'ós dehan livru ne'e perfeitu maibé maizumenus bele iha netik istoria ida-ne'ebé mak ami hahú iha 1974 idade ne'ebé hanesan ho alin sira, ne'ebé husik hela ami-nia istoria ruma atu nune'e joven sira bele lee, bele hatene di'ak liután istória ba rai ida-ne'e no kontribuisaun ba partisipasaun feto nian importante tebes ba ita-nia luta ba ukun rasik aan,” nia akresenta.

Livru ne'e hahú hakerek iha 2010 ho durasaun tempo ne'ebé naruk no iha 2021 mak foin ba iha lansamentu

“Livru ida ne'e sei halo mós diseminasaun semináriu, livru balun mós ami sei lori mai iha Muzeu Rezisténsia atu nune'e bele asesu ba iha leitura ba públiku no balun mós kúrríkulu istória feto nian komesa la'o hela, ami halo koordenasaun ho Ministériu Edukasaun para bele fó oportunidade ba kúrrikulu ida-ne'ebé maka ko'alia mós kona-ba istoria feto Timor nian", tenik Veterana Florentina Smith.(*)