Vise-Xefe Bankada CNRT Patrocínio Fernandes dos Reis, deskobre iha indisíu forte korrupsaun iha Ministériu Transporte no Komunikasaun tanba iha orientasaun atu halais selebra kontratu hasa’e folin aluga Ró-Ahi ne’ebé atu mai husi rai-li’ur.
Bankada CNRT asesu dokumentu balun ne'ebe hamosu deskonfiansa kona ba Ministru José Agostinho da Silva husu kuotasaun 2 ba kompañia sira-ne’ebé fo aluga ro-ahi. Kompania ida propoin $150,000.00 kada fulan, no kompañia ida seluk propoin $180,000.00 kada fulan.
“Hafoin simu tiha kuatasaun refere, ministériu orienta kedas APORTIL hodi prepara lalais kontratu ba kompañia ida oferese ho folin USD 150 mill ne’e, maibé husu atu iha kontratu hasae nia folin ba ba $220 mil. No husu atu selebrasaun kontratu ne’e halo de’it iha APORTIL, maibé to’o agora kontratu refere seidauk bele asina tanba APORTIL dúvida ho asuntu ne’e,” Vise-Xefe Bankada CNRT, Deputadu Patrocínio Fernandes dos Reis, informa liuhusi deklarasaun polítika iha Parlamentu Nasionál, tersa (02/02).
Bankada CNRT esplika, autoridade APORTIL seidauk asina kontratu tanba dúvida ho orientasaun Ministru Jose Agostinho ne’ebe kontradiz ho valór kuotasaun ne’ebé kompañia propoin.
Bankada CNRT ezije ba Komisaun Anti Korrupsaun no Ministeriu Publiku atu interven iha prosesu ida ne’e hodi salva Estadu nia osan.
Bankada CNRT haree katak Ministru José Agustinho konsientemente envolve viola lei hodi benefísia ba nia interese privadu.
Bankada CNRT mós haree Ró-Ahi lubuk ida mak durante ne’e halo operasaun iha RAEOA no Atauro, no atende hela komunidade sira ho di’ak mesmu ké Ró-Ahi Nakroma la halo nia operasaun dezde fulan-Dezembru tinan 2020.
Relasaun ho kestaun hirak ne’e, Bankada CNRT husu no ezije Komisaun Antí Korrupsaun (CAC) no Ministeriu Publiku atu loke investigasaun lalais ba Ministériu Transporte no Komunikasaun no APORTIL, antes osan Estadu lakon hodi hapara mós kontratu hotu-hotu relasaun ho Ró-Ahi hodi hein rezultadu investigasaun nian.
Bankada CNRT mós husu Parlamentu Nasionál atu bolu Ministériu Transporte no Komunikasaun hodi mai esplika iha Parlamentu kona-ba kondisaun no situasaun Ró-Ahi Nakroma nian ne’ebé seidauk hatene loos fulan hira mak atu hala’o fali nia operasaun, nomoos prosesu tomak ba selebrasaun kontratu no aluga Ró-Ahi husi rai-li’ur ne’e.
Relasiona ba akuzasaun husi Bankada CNRT hasoru Ministru Transporte no Komunikasaun, www.tempotimor.com koko kontaktu ona ba Ministru Jose Agustinho via telemovele maibe ministru la atende telefone nune'e to'o notisia ne'e hatun seidauk hetan klarifikasaun husi parte Ministru nian. (*)