Nia ko'alia ne'e, tanba realidade hatudu ona, iha semana hirak ikus, Deputadu balun ho nian kondutór, husi Komisaun espesializada balun, ne'ebé simu tiha osan perdiem inklui kupon mina $ 100 dolar, maibé la ba servisu fiskalizasaun.
"Husu ba parlamentu ida ne'e no KAK atubele haree kona-ba komisaun espesializada hotu-hotu, deputadu sira, sé mak ba nia simu osan no asina, se mak la ba maka nia asina," dehan nia iha plenariu PN, tersa (02/02).
Nia husu kuandu iha futuru, bainhira haree deputadu komete simu perdiem la ba servisu tenke lori prosesu ne'e ba KAK atu investiga, tenke iha justisa, nune'e halo tratamentu ho igualdade.
Nia haktuir, kestaun perdiem ne'e tutela ba Parlamentu Nasionál nia kompeténsia.
"Laiha serventi, laiha kriadu, laiha mainatu, laiha mós patraun, ne'ebé ema kriadu ba servisu, sira seluk tuur simu de'it osan," dehan Bisoi.
Ne'e duni, agora ne'e tenke halo buat ne'ebé loloos, para deputadu bele hatene, tanba balun ba servisu nia hetan osan, balun la ba servisu mós hetan osan, ne'e lójika ka lae.(*)