Tempotimor (Dili)-Vise-Koordenadór Partidu FRETILIN Munisípiu Dili Libert Soares, hateten destinu partidu Fretilin ba tinan-lima oin mai sei deside liuhusi Kongresu Nasionál.

Ne'e duni, nia lori estrutura Fretilin Munisípiu Dili, apela ba militante hotu-hotu iha territóriu timor laran tomak atu pasiénsia no labele preokupa ho eleisaun lideransa Fretilin nian ne'ebe sei mosu mai.

"Kongressu Nasionál mak órgaun aas liu iha partidu, hodi desidi destinu partidu Fretilin nian ba tinan lima ba oin," dehan nia liuhusi konferénsia imprensa iha CCF, Komoro, Dili, sesta (26/2).

Nia hatete, Kongresu Nasionál no eleisaun direta ba lideransa Fretilin, ida ne'e bazeia ba artigo 60 husi estatutu Fretilin nian.

Tanba ne'e relasiona ho dinámika expresaun polítika militante sira-nian, ne'ebé hahú preokupa eleisaun lideransa Fretilin nian, maka kuadru estrutura Fretilin munisípiu Dili, hakarak apela hanesan tuir mai ne'e:

Ida, husu ba militante Fretilin sira, tuur hakmatek no akompaña desizaun husi reuniaun Comité Central Fretilin iha tempu badak, hodi prepara ba Kongresu Nasionál, tanba Kongresu Nasionál mak órgaun soberanu aas liu iha partidu hodi deside destinu Partidu Fretilin nian, tinan lima ba oin.

Rua: aprezentasaun kandidatura ba lideransa Partidu nian, tuir estatutu, tenke aprezenta kandidatu na'in-rua, Prezidente no Sekretáriu Jerál iha pakote ida de'it, iha loron kongresu nasionál de'it. Karik
reuniaun CCF deside ba eleisaun direta, KNPO sei loke tempu ba aprezentasaun pakote kandidatura nian.

"Militante sira tuur hakmatek, la presiza ba hakilar tún sa'e hodi fó oportunidade ba ema seluk ne'ebé la pertense ba Fretilin atu tama halo baralla iha Fretilin nia uma laran," dehan nia.

Tolu: Husu ba militante no kuadru sira iha organizasaun baze, Juventude Fretilin, OPMT, organizasaun filiadu sira hotu iha Dili nian, atu konsentra ba serbisu hamutuk reforsa estrutura Aldeia sira, AGM Suku
sira, Komisaun Polítika Postu Administrativu, hodi garantia vitória ba Fretilin iha Eleisaun Prezidensiál 2022 no Eleisaun Parlamentár 2023.

Haat: Apela ba militante no simpantizante Fretilin hotu iha Dili atu hametin demokrasia iha uma laran Fretilin, hodi tane aas valór luta Fretilin nian ne'ebé eroi sira husik hela.(*)