Tuir fonte kredivel ne’ebé besik liu autoridade sira informa ne'e ba www.tempotimor.com, operador ISP boot 3 hanesan Timor Telecom, Telemor no TELKOMCEL komete irregularidade maibé autoridade sira rasik to’o ohin loron la hola medida.

Fontes ne'e hateten, lei ba jere frekuénsia no ekipamentu sira-ne'ebé liga ba setór telekomunikasaun uza ba internet ne'e regula iha dekretu-lei númeru 15/2012 maibé dekretu-lei iha artigu balun fó kompetensia ba ANC atu atu jere no halo jestaun ba Broad band Internet.

Nune’e Servisu Rejistu no Verifikasaun Emprezariál (SERVE) fó ona lisensa ba kompañia sira hodi hala'o servisu internet maibé seidauk hetan lisensa husi ANC no meiu ne'ebé uza hodi hatama internet mak liuhusi rede frekuénsia ou fiu ka kabu submarine, frekuénsia hanesan uza vsat, satelite no antena access point.

Fonte ne’e informa, operadór sira-ne'e presiza hetan lisensa no kompañia sira balun tenta ba rejistu maibé la hetan intensaun husi ANC no la hetan resposta. Hanesan kompañia sira-ne'ebé mak uza vsat no frekuénsia boot hanesan microwave.

“Sim, lei espesífiku ba ISP seidauk iha maibe lei ba regula frekuénsia no meiu teknolojia telekomunikasaun iha ona. Iha dekretu-lei númeru15/2012, ne'e mak foin daudaun ne'e Ministériu Transporte no Komunikasaun (MTK) aprezenta tán dekretu-lei ba jere rede externa, maibé la hetan aseitasaun husi Konsellu Ministru. Ikus mosu fali dekretu-lei ne'ebé lufu-lafu de'it hodi altera dekretu-lei númeru 15/2012,” fonte ne’e haktuir hosi WatsAAp, kinta (25/02).

Nia esplika, Telemor mak fasilita nia torre iha Batugede ba elite komputer hodi tiru ba Atambua ba kompañia PT Nap Info Nusa, liuhusi frekuénsia Microwave hodi hatama internet no Telemor mós foti internet husi Kompañia rua tán iha Atambua.
Ikus mai Telemor nia torre iha Tibar mak tiru ba Alor foti internet husi PT Mora Telematika Indonézia.

“Timor Telecom mós uluk fasilita torre ba Ellite iha Balibo tiru ba Atambua, ikus TT nia torre iha Tibar mak tiru ba Alor foti internet. Ne'e uza frekuénsia microwave ne'ebé regula iha dekretu lei,” informa fonte kredivel ne’e.

Nia hatutan, Telemor mós uza frekuénsia 1800 mhz la selu dezde tinan 2017 mai to’o 2020 ne'e. No lei hatete só operadór tolu ne'e mak bele fó aluga ba malu no uza fasilidade antena operadór nian ne'ebé la rejista iha ANC hodi hatama internet.

“Telkomcel mós hanesan torre iha Balibo. Batugade no Fatumean uza microwave frekuénsia tiru ba Atambua hodi hatama internet. Sira laiha lisensa ba cross border entre nasaun. Kompañia Indonézia sira-ne'e kuaze maioria laiha lisensa export internet mai nasaun seluk. Sala boot ne'e iha ANC, sira hatene hela iha irregularidade dezde tinan 2016 mai to'o agora maibé husik de’it,” fonte konfirmadu ne’e haktuir.

Nune’e mós Telkomcel komete irregularidade uza frekuénsia 2300 Mhz, ne'ebé tuir los ANC fa’an maibé sira uza de’it sein hetan lisensa husi ANC hahu kedas iha 2019, frekuénsia ne'e mak uza 4G no hodi aumenta banda internet.

“Sira uza liña únika ne'ebé foti iha frontiera Atambua-Kupaun-Jakarta mak ba Singapore. Ami bolu hiding network (jaringan yg terselumbung). Sira uza Hiding Network, mak Operador Telkomcel uza 2300 Mhz no Telemor 1800 Mhz ne’ebé La selu lisensa no taxa. Ne'e só aparellu karreta ANC nian mak deteta ho ema IT sira-ne'ebé mak iha área telekomunikasaun,” fonte ne’e hateten.

“ANC iha tinan 2020 fulan-juñu no novembru sira deteta ona ilegál sira-ne’e no tékniku sira aprezenta ona relatóriu maibé boot sira la halo ba kazu no selu taxa maibé menus,” dehan fonte ne’e.

Fonte ne’e fó-sai katak, operador balun uza frekuénsia barak liu no pendapatan tahunan boot maibé selu menus kompara fali ho operadór seluk ne'ebé mak uza frekuénsia menus no pendapatan menus,” nia katak.

Nia subliña, rezolusaun ba jere tarefa frekuénsia mós iha ona 29 juñu 2019 no espera katak alterasaun ba dekretu-lei foun ne'e sei la fó vantajen ba operadór Telkomcel, tanba jestaun ba frekuénsia ba operadór tolu ne'e iha atribui hanesan ne'e 15+15+15 Mhz ba operadór rua TT ho Telemor maibé Telkomcel hetan.

“Haree de’it Telemor nia rede haleu Timor laran tomak uza 2G, 3G no 4G. Uza frekuénsia barak liu Telkomcel mós hanesan,” dehan fonte kredivel ne'e.

Fonte ne'e haktuir, Timor Telecom rede seidauk kobertura hotu to'o área rurál entaun uza frekuénsia menus.

“ANC iha hotu dadus frekuénsia ne'ebé rejistadu no frekuénsia ne'ebé la rejistu kada operadór no lista torre no uza ekipamentu saida de’it ANC iha dadus tanba estadu fasilita sira ho teknolojia ne'ebé ho avansada (canggih) ho folin boot osan rihun $750 hola iha tinan 2015,” fonte ne’ebé besik autoridade telekomunikasaun lekar sai.

Nia dehan, ANC lakohi fó lisensa lalais ba kompañia ISP tanba operadór balun ta’uk lakon nia kliente, ne’e situasaun ne’ebé tristeza no fó prejuizu ba estadu lakon osan millaun.

Fontes ne'e informa, Iha dekretu lei númeru 15/2012 artigu 74 hateten, sé operadór ka ema individuál halo infrasaun iha setór telekomunikasaun sei multa millaun $2 kontinua no rihun $5 kada loron dezde operadór ida komete infrasaun ne’e.

“Operadór ka ema individuál sira-ne'e halo ona irregularidade hanesan uza frekuénsia ilegál ka ekipamentu sira iha telekomunikasaun kuandu ANC deteta imediatu aprezenta notifikasaun ba operadór sira ho faktu no dadus hodi fó multa ba sira tenke selu millaun $2 tuir kedas.

Nia haktuir, osan rihun $5 kada loron ne’ebé kompañia operadór sira viola hahú kedas iha 2017 to’o mai iha 2020, 4x2 millaun x rihun $5 kada loron X 360X4,” fohntes ne’e esplika.

“Lei fó dalan ba ANC aprezenta notifikasaun tanba sira deteta tiha ona no faktu iha terrenu sira rasik deteta tiha ona. Piór liu Prezidente Interinu ANC halo karta ba operadór sira iha 2021 janeiru hatete katak só operadór tolu ne'e mak hetan autorizasaun hatama internet ho karta ida antes iha tinan 2020. Sira rekoñese de’it mak operadór tolu ne'e mak iha lisensa ba hatama internet.
Ne'e hatete katak sira seluk ne'e la hetan lisensa, anesan kompañia ISP sira seluk,” hateten fonte konfirmadu ne’e.

Nia hateten, kazu ne'e komplexu tebes, kompañia balun hakarak kumpri no tuir lei maibé ANC la fó dalan.

Fontes ne'e fó ezemplu , kazu Ceslink, Konsellu Ministru apresia tiha maibé ba ANC halo tiha kanselamentu.

“2018 Telemor nia pendapatan tahun bersih depois selu tiha taxa nia hetan millaun $32,” dehan nia. (*)