Sekretáriu Estadu Formasaun Profisionál no Empregu (SEFOPE), Alarico do Rosário esplika, traballadór sira ne'ebé konsidera servisu ilegál, tanba halai sees husi kontratu anteriór, ne'ebé molok ne'e sira kontrata ho ajénsia sira, maibé ikus mai sira halai sees, hodi buka fali servisu iha fatin seluk, iha sidade sira, iha nasaun Koreia Súl nian.

Tanba ne'e, Alarico hatete, dadaun ne'e SEFOPE buka hela dalan oi-oin, atu bele komunika ho ajénsia sira, hodi bele rezolve problema traballadór nian, ne'ebé halai sees husi kontratu.

"La'ós laiha planu lae, ita koko meius oi-oin de'it, para ko'alia ho sira liuhusi video call, liuhusi governu, entre embaixadór Timor-Leste iha ne'ebá, ita koko ko'alia meius hotu, maibé tanba sira ita la hatene, tanba ne'e mak, ami sei buka hela meius, oinsá para iha tempu badak bele solusiona", dehan Alarico ba jornalísta sira, hafoin halo despedida ho traballadór nain 20, iha salaun SEFOPE Caicoli, tersa (23/02).

Nia mós preukupa, kona-bá adidu sira ne'ebé molok ne'e, governu halo ona nomeasaun, maibé to'o agora seidauk ba hala'o servisu iha Koreia Súl, tanba mundu enfrenta hela problema globál Covid-19.

Nia esplika, tuir regra normál, bainhira timor-oan sira haruka ba servisu, governu entre nasaun rua TL ho Austrália rasik, sempre halo akordu, inklui mós akordu entre ajénsia sira ho traballadór sira rasik, nune'e bele iha kontrolu.

"Agora, ida halai hanesan ne'e, ita atu kontrola sira ba to'o iha ne'ebé. Bá servisu iha to'os, mais iha kompañia ida ne'ebé, ita la hatene. Ida ne'e mak susar oitoan, para ita atu kontrola sira", nia preokupa.

Ho situasaun ne'e, nia husu ba traballadór sira ne'ebé, atu bá servisu, labele banati tuir hahalok ladi'ak ne'ebé sira seluk halo, tanba bainhira sai husi TL, tenke iha kompromísiu ida katak, hadomi Timór, família, no tenke kumpri regra saida de'it.

"Maibé, ita koko atu buka tuir nafatin hadi'a situasaun ida ne'e, ba oin, tenke ser hadi'a", nia hakotu.(*)