Tuir dukumentus ho numeru referensia 09/DNIA/II/2021, ne'ebé tempotimor asesu katak, RTTL, EP liu-husi Diresaun Nasionál Informasaun no Atualidade (DNIA) sei hapara ninia staf ho naran Gracilda Oliveira iha ninia servisu.

"DNIA hakarak fo hanoin katak, iha fulan marsu 2021, ita boot sei la halo ona servisu no funsaun operasional iha DNIA RTTL, EP, sei enkamina ita boot ba iha Diresaun Nasionál Administrasaun no Finansas (DNAF), departamentu rekursu Umanu hodi prosesa, enkuantu DNIA sei loke fali vaga ne'e ba públiku, tanba urgente ba seksaun portugues iha instituisaun RTTL,EP", haktuir iha dokumentu ne'ebé Tempotimor asesu iha loron segunda, (22/09/21).

Iha karta ne'e sita mos katak, instituisaun RTTL, EP liu-husi DNIA hato'o apresiasaun boot ba fungsionariu refere, tanba hatudu ona didikasaun no kontribuisaun ba dezemvolvimentu instituisaun durante ne'e, prinsipalmente iha seksaun portuges.

Honra mos ba instituisaun RTTL, EP, tanba ho Gracilda nia kapasidade no abilidade bele kompete ona iha kampu traballu ho ema seluk, ne'ebé hatudu ita boot mos liu ona iha faze selesaun dokumentus.

DNIA fo apoiu maximu atu kontinua partisipa iha vaga ne'e, hodi fo mos nia kontribuisaun iha instituisaun foun tuir mai. DNIA konsidera ne'e desizaun ema profisionál no mutual sei la impede konkorente nia partisipasaun iha prosesu ne'e.

Iha karta ne'e hetan asinatura husi Diretór Nasionál DNIA, RTTL, EP, Domingos Viana Belo. (*)