Tanba, Autoridade seguransa hanesan Falintil-Forsa Defeza Timor-Leste (F-FDTL) ho Polisia Nasional Timor-Leste (PNTL) kontinua asegura fronteira terestre 24 oras hodi halo apelu ba komunidade oinsa kumpri regras prevensaun Covid-19, maibe sidadaun balun tente nafatin tama no sai ho dalan ilegál ne'e hatudu laiha konsiensia.
Segundu Komadante Operasaun Sentru Integradu Jestaun Krize (SIJK), Brigadeiru Jenerál João Miranda "Aluk Deskate" afirma, nasaun viziñu indonesia ne'ebé besik tebes Timor-Leste, kada loron numeru kazu Covid-19 sa'e makas nafatin, tan ne'e iha nesesidade ema hotu presiza servisu hamutuk ho autoridade seguransa no profisionál saúde sira hodi evita hada'et moras iha rai laran.
"Estadu de seguransa dala barak ita kestiona, maibe liu-liu kmunidade seidauk iha konsensia, oinsa ita atu halo implementasaun ho di'ak", dehan Aluk iha sala situasaun SIJK, Sentru Konvensoins Dili (CCD), merkadu lama, sabadu, (20/02/21).
Dadaun, Timor-Leste laiha fasilidade oituan ne'ebé atu apoiu ba kombate moras Covid-19, nune'e bainhira mosu transmisaun lokál bele grave liu.
"Tanba ida ne'e mak, iha nesesidade husi Polisia Nasionál Timor-Leste (PNTL) halo seguransa durante 24 oras no 7 dias halo movimentasaun nafatin hodi fó apelu ba komunidade sira oinsa mak halo implementasaun medidas ne'ebé protokolu estabelese husi Ministériu Saúde atu ita bele hadook husi Covid-19" dehan Nia
Tanba ne'e, molok to'o iha risku moras Covid-19 nia hada'et, di'ak liu ema hotu esforsu ho konsensia hodi implementa medidas prevensaun ne'ebé husi Ministériu Saúde fó sai ona, hanesan evita tama no sai ilegál iha fronteira, mantein distansia sosial metru ida, labele halibur malu, no fase liman ho sabaun bei-beik. (*)