Governu oferese orsamentu ba uma kreda Timor ne'e, liu-husi serimónia públika asinatura ba akordu subvensaun konferênsia episkopal timorense.
"Onra boot dala-ida-tan asina akordu ho reverendiximu Don Virgílio do Carmo da Silva, kona-ba subvensaun ne'ebé tinan-tinan governu dispoin tuir konkordata ba iha konferênsia episkopal", dehan Primeiru Ministru, Taur Matan Ruak hafoin serimónia públika asinatura ba akordu subvensaun konferênsia episkola timorense iha palásiu governu, sesta (19/02/21).
Xefe governu afirma, tinan 2021 primeira vez governu desidi aumenta tetu orsamental ba tokon $15, tuir posibilidade ne'ebé governu iha atu finansia planu konferênsia episkopal nian.
Nune'e mos Arsebispu Metropolita, Bispu Dioseze Dili, Don Virgílio do Carmo da Silva, afirma, ohin asina akordu subvensaun ne'ebé governu fo ba uma kreda ba tinan 2021 nian, tuir konkordata antes tinan hirak liu ba selebra uluk ona.
"Orsamentu ba 2021 ninian tuir akordu ne'ebé hau asina ne'e $15 milloes", dehan Don Virgílio
Uma kreda Timor asina akordu subvensaun ho governu kada tinan ne'e, bazeia ba konkordansia ne'ebé hahu ona iha tinan 2015 liu-ba.
"Tinan-tinan bazeia ba konkordata ne'ebé uma kreda santa sé ho governu asina iha 2015 fo biban ba governu fo subvensaun ba uma kreda Timor, tinan-tinan hetan suvensaun ida ne'e presiza asina akordu balun",tenik Nia
Iha asina akordu ne'e, oloos Prezidente Konfernsia Episkopal Timorense (KET), Dom Norberto do Amaral, Bispu Dioseze Maliana mak mai asina akordu subvensaun ho governu, maibe dadaun Munisípiu Bobonaru Lockdwon hela, entaun labele mai prezensa, entaun Bispu Dioseze Dili Don Virgílio mak reprezenta.
"Atu hetan subvensaun ida ne'e presiza asina akordu balun, tan ne'e mak atu hatan ba rekezitus nian, loloos ohin ami na'in tolu, maibe Don Norberto nu'udár prezidenti Konfernsia Episkopal, maibe Maliana dadaun Lockdwon total nia labele mai, entaun husu hau reprezenta nia hodi asina akordu", Nia informa
Tuir konkordata ne'ebé governu oferese subvensaun ba uma kreda Timor kada tinan, orsamentu hirak ne'e igreja aloka ba kategoria 4.
"Atividades nafatin, primeiru atividade 50% husi orsamentu ne'e sei aloka ba area edukasaun nian, segundu 25% aloka ba servisu sosiais, 15% ba governa igreja, no 10% ba administrasaun jestaun", dehan Don Virgílio. (*)
