Dadus atualizada to’o 16 fevereiru 2021, oras 17.00, ne’ebé Konsuladu ne’e envia ba www.tempotimor.co, BELU/Atambua kompostu hosi totál kazu konfirmadu 220, sei halo tratamentu ema na’in-36, rekupera ona ema na’in-175 no ema na’in-9 mate.

Husi parte Soe nian (Timor Tengah Selatan) totál konfirmadu 245, na’in-68 halo hela tratamentu, rekupera ona na’in-163 no na’in-14 mate.

Iha fali Kefa (Timor Tengah Utara) totál konfirmadu hamutuk 82, pasiente na’in-36 halo hela tratamentu, rekupera ona na’in-42 no ema na’in-4 mate ona.

Purtantu totál kazu konfirmadu iha Sidade Kupaun hamutuk 3601, pasiente na’in-1646 halo hela tratamentu, rekuperadu 1687 no na’in-88 mate.

Hosi parte Munisípiu Kupaun iha kazu konfirmadu 216, na’in-128 halo hela tratamentu médika no na’in-78 rekupera ona no na’in-10 mate.

Hosi parte Malaka/Betun totál kazu konfirmadu 53, na’in-9 halo hela tratamentu, na’in-40 rekupera no na’in-4 mate.

Entretantu totál kazu konfirmadu iha Provínsia Timor Osidentál (Provinsi NTT) hamutuk 7630, ema na’in-2591 halo hela tratamentu, rekupera 4838 no na’in-201 mate.

“Situasaun mós perigu loos tebes. Tuir dadus ne'ebé ha’u sempre akompaña horisehik nian dia 16/02/21. Vasina iha-ne'e mós komesa ona maske seidauk hala’o hotu, maioria mate kuaze ema ho idade 50 anos ba leten,” Konsultadu Timor-Leste nian iha Kupaun informa ba www.tempotimor.com, liuhosi watshaap, kinta (17/02/2021).

Nia haktuir, atividade servisu la’o hela no kumpri regra ne'ebé Guvernu lokál halo hanaran PSPB (Pembatasan Sosial Bereskala Besar), tau mós atensaun másimu ba Protokolu Saúde iha edifísiu no areadór Konsuladu nian.

“Ami servisu ho sistema WFH no stengah hari kerja. Relasiona ho situasaun virus COVID-19 ne’ebé alastra maka’as liuhusi transmisaun lokál no kuaze lideransa ka governante barak maka hetan ona virus ida-ne’e (positif ) henesan Governadór rasik ho nia Vise-Governadór nomos pejabat sivíl no militár sira seluk,” nia informa.

Konsuladu ne'e hala’o funsaun nu’udar Reprezentante Governu Timor-Leste nian, fó atendimentu konsulár no fó asisténsia hodi proteje sidadaun Timoroan sira-ne'ebé hasoru problema.

Nune’e mós kontinua hala’o relasaun servisu di’ak ho instituisaun Guvernu lokál, mantein relasaun di’ak no tau atensaun mós ba atividade iha postu entrada iha liña fronteira.

Tuir nia, liña koordenasaun la’o di’ak tanba hetan orientasaun husi Embaixada RDTL iha Jakarta no Ministériu Negósiu Estrangeiru no Kooperasaun (MNEK) Timor-Leste nian.

Konsuladu ne’e ho diplomata sira iha Kupaun seidauk feiras tanba seidauk iha lisensa husi MNEK atubele ba pasa ferias ho família sira iha Timor-Leste tanba razaun ho situasaun COVID-19 ne’ebé sei maka’as hela iha rai hotu-hotu, liuliu iha Indonézia.

“Ba ida-ne’e ami mós kumpri tebes no hein de’it, sé iha loron oin mai sé karik fó, ami bele ba Timor-Leste, maibé ami mós sei kumpri protokolu saúde ho medida katak tenke ba kuarentena no halo teste no vasina karik iha ona,” Konsuladu Timor-Leste nian iha Kupaun, Jesuino dos Reis de Matos Carvalho hateten.(*)