Ministra Saúde (MS), Odete Belo afirma, bainhira akontese surtu covid-19, laiha planu atu inplementa vasinasaun iha Timor-Leste, tanba ne'e aloka orsamentu ba Covid-19 la inklui sosa vasina.
"Tanba ita laiha osan ba sosa vasina, osan ida ne'ebé agora iha ba 2021 ne'e 31 milloens, ne'e MS nia osan ne'ebé mak alokadu marking hotu ona ba konstrusaun sira, karantina, otel, selu pessoal saúde sira ne'ebé mak durante ne'e ita halo, ne'e la'os ba vasina, ita la ko'alia kona-ba vasina iha perparasaun OJE 2021, ita la ko'alia kona-ba atu kompras vasina nian," dehan Odete iha Parlamentu Nasional, Tersa (16/02/21).
Tanba ne'e, orsamentu ne'ebé dadaun atu implementa ba vasina iha Timor-Leste hetan apoiu husi governu australia.
Ministériu Saúde mos hamutuk ho parseiru saúde sira deside ona vasina Astrazeneca's ne'ebé mak sei implenta ba total 20% husi populasaun iha Timor-Leste.
Vasina ba 20% populasaun ne'e sei hetan ajudu orsamentu husi governu Austrália nune'e bainhira 80% seluk sei vasina ho maneira rua hanesan sei uza rekursu husi osan rasik, maibe presiza husu autorizasaun husi deputadu sira iha Parlamentu Nasional (PN) ou bele mos utiliza relasaun billateral ho Austrália hodi finansas.
Antes ne'e, iha loron segunda 15 fulan fevereiru tinan 2021, governu liu-husi reuniaun Konsellu Ministru hasai rezolusaun ida hodi desidi tipu vasina Astrazeneca's mak merese atu implementa iha Timor-Leste. (*)