Iha OJE 2020 Governu aloka ona Orsamentu ho montante hamutuk tokon $71 ba finansia programa Cesta Bazika, maibe dadaun governu atu ko'a fali tan Orsamentu Jeral Estadu OJE tinan 2021 nian 7% ba sesta bazika, nune'e parte MKAE informa, ajustamentu ne'e MF mak halo.
MKAE, Joaquim Amaral afirma, planu ko'a osan 7% ne'e, Ministériu Finansas mak hatene, tanba orsamentu estadu nian no sistema hotu iha MF.
"Esplikasaun loos imi husu de'it Ministériu Finansas, tanba osan ne'e sira mak halo, hau ko'ordena programa orsamentu ho sistema tomak ne'e bele husu ba Ministériu Finansas", dehan Nia hafoin sorumutu ho Primeiru Ministru Taur Matan Ruak iha palásiu governu, segunda (15/02/21).
Tanba, sistema ajustamentu osan 7% kada Ministériu ba implementasaun programa cesta bazika ne'e Ministériu Finansas mak halo.
"Ita nia pagamentu hotu iha Ministériu Finansas, kontratu hotu haruka ba Ministériu Finansas ne'ebé ninia sistema atu ajusta halo nusa orsida Ministériu Finansas mak fo informasaun loos, Duke orsida hau ko'alia informasaun la hanesan", Nia hatutan
Maibe, nia dehan, ajustamentu osan 7% kada Ministériu ba programa cesta bazika, tanba OJE tinan 2021 la preve osan ba cesta bazika.
"Iha ajustamentu atrazu ituan labele re-orsamentu iha 2021, tanba ne'e mak tenki halo ajustamentu interna ne'ebé lori kobre despeza programa ne'e la'o ba oin", dehan Nia.
Ko'a orsamentu husi kada Ministériu 7% ba implementasaun programa cesta bazika ne'e la afeita ba Orsamentu tinan 2021 ne'ebé maske aloka ba Ministériu pur programa.
"Lae, tanba ne'e halo ajustamentu halo serbisu ho Unidade Planeamentu Monitorizasaun Avaliasaun (UPMA), sei bele mantein programa ninia ritmu ne'ebé iha, kuaze la afeita tanba altera ajustamentu ne'e inisiu", Nia afirma
Nia garante, orsamentu 7% ne'ebé ko'a kada Ministériu ba programa cesta bazika ne'e sufisienta ona to'o termina.
Implementasaun programa cesta bazika dadaun ninia ezekusaun atinzi liu ona 50 pursentu. (*)