Iha rezolusaun ne'e, hahu loron tersa 16 fulan fevereiru to'o loron 3 fulan marsu tinan 2021, komunidade iha munisipiu rua refere sei la halo movimentu mai kapital Dili no munisipiu sira seluk, nune'e mos munisipiu seluk sei la halo movimentu ba Bobonaru ho Kovalima.

Ministru Prezidensia Konsellu Ministru, Fidelis Leite Magalhães afirma, transporte publiku no privadu sei la halo movimentu ba mai Bobonaru ho Kovalima.

"Asuntu ida ohin hetan deliberasaun husi Konsellu Ministru maka aprovasaun ba impozisaun serka sanitaria ba Munisipiu Bobonaru no Kovalima",Nia informa liu-husi konferensia imprensa hafoin reuniaun Konsellu Ministru extraordinariu iha palásiu governu, segunda (15/02/21).

Nune'e, hahu hosi aprovasaun no publika sai rezolusaun governu nian, sei aplika serka sanitaria ba Munisipiu rua refere.

"Tanba, numeru ilegal ne'ebé tama no foin lalais ne'e iha hirak ne'ebé tama ilegal subar de'it, ate ariska ema barak ninia vida liu-liu iha munisipiu Bobonaru zona Hauba, Marobo no Lourba", tenik Nia

Entaun, ho ida ne'e governu hanoin importante atu impoin serka sanitaria.

"Hafoin publikasaun ida movimentu ema nian tama no sai husi Munisipiu rua sei para hotu, ne'ebé Bus, transporte sira ba mai viajem ba mai husi Munisipiu sira seluk ba Munisipiu rua sei para hotu no husi Munisipiu rua Bobonaru no Kovalima mos sei para hotu", Nia esklarese

Iha rezolusaun ne'e, so fo autorizasaun de'it ba hirak ne'ebé lori sasan umanitaria no nesesidade urjente sira, maibe pasajeiru sira viajem ba mai normal bandu sei la halo movimentu.

Kona-ba funsionamentu atividade aprendisajen eskola, igreja, negosiu iha munisipiu Bobonaru no Kovalima ne'e, Ministériu Saude (MS) ho Ministériu Edukasaun Juventude no Desportu (MEJD) mak sei tetu hodi desidi hapara ou kontinua funsiona.

Tanba ne'e, parte governu husu ba komunidade iha Munisipiu Bobonaru no Kovalima atu kuida malu kopera ho autoridade hotu hodi evita da'et moras Covid-19 nian iha rai laran. (*)