Ministru Jerónimo hato'o komentariu ne'e hodi responde ba deputadu bankada CNRT nian ne'ebé kestiona desizaun governu atu ko'a osan 7% kada ministériu.
Nia dehan, di'akliu entrega problema ne'e ba governu mak rezolve tanba problema ne'e la'ós bankada nian.
"Kona-bá atu deliberasaun, ka atu ko'a 7%. Ida-ne'e governu ninia solidariedade ba malu, ne'e governu mak rezolve problema ida ne'e, la'ós bankada nian," dehan nia ba www.tempotimor.com iha Parlamentu Nasionál, segunda (15/2).
Governante ne'e husu Bankada parlamentar sira atu akompaña bainhira tinan 2021 to'o ona fulan novembru no dezembru mak bele fiskaliza servisu governu nian.
"Hanesan ne'e mak loos, tanba agora ita foin mak hahú de'it ba, ohin mak foin fevereiru," hatete nia.
Governante ne'e rekoñese, normalmente tinan-tinan kuandu hahú fulan-janeriu no fevereiru, governu sempre halo adjustamentu ba sistema, halo adjustamentu sira ne'e hotu, mak foin tama iha faze implementasaun programa boot sira.
"Bankada dúvida ami, ami mos rekoñese katak sira dúvida tanba sira seidauk haree, maibé fó tempu ba ami to'o iha fulan-dezembru tama diskusaun orsamentu jeral estadu 2022, mak sira dehan mai ami la halo buat ruma ne'e mak loos,"dehan nia.(*)