Hanesan públiku hatene, mosu duun-malu ba relatoriu KIP entre membru KIP rasik ne’ebé ikus mai halo relatoriu refere la konsege hetan aprovasaun.
Ba rezultadu serbisu KIP ne’e, Primeiru Ministru Taur Matan Ruak hatete, KIP kaduka ona tan ne’e governu sei toma responsabilidade hodi rezolve problema projetu 143.
"Komisaun Inkéritu Parlamentar (KIP) ne'ebé kaduka ona i agora governu asume knaar atu haree oinsa mak rezolve problema sira ne'ebé liga ba infra-estrutura", dehan PM Taur hafoin hasoru-malu ho Prezidente Repúblika Francisco Guterres Lu Olo iha palásiu prezidensial Bairro-pite, Kinta (23/05/2019).
PM Taur dehan, governu asume responsabilidade atu oinsa regulariza. Tanba husi projetu 143 ne’e, PM dehan, maioria bele dehan tuir prosedimentu, maibé iha balun mak la tuir prosedimentu.
“Mais naturalmente governu sei buka solusaun ba problema sira ne'e,” dehan Xefe Governu ne’e.
Ba kompaña hirak ne’ebé laiha kontratu, PM Taur dehan, governu iha regra admistrativa, prosesual no legal, atu uza hodi bele buka solusaun.
"Ba sira ne'ebé laiha kontratu ne'e ita iha ita-nia regras administrativas no prosesuais no legais. Ita tenke haree bazeia ba ida ne'e. Tanba ne'e mak nia prosesu ida ke sei halo estudu, hasai dadus par hatene loloos ida ne'ebé mak la kumpri, la kumpri ne'e tanba saida, par ita haree oinsa mak bele hetan solusaun," hateten PM Taur.