Print this page

MNEK Husu Membru Governu Ho Parlamentu Limite Viajen ba Jakarta Featured

MNEK, Dionisio Babo Soares, Ko'alia hela ho Jornalista MNEK, Dionisio Babo Soares, Ko'alia hela ho Jornalista Foto Especial

TempoTimor (Dil) - Relasiona ho situasaun iha kapital Indonezia, Jakarta, ne'ebé manas iha loron rua nia laran, 21 no 22 Maiu, Ministériu Negosiu Estrajeiru no Kooperasaun husu ba membru Orgaun soberanu sira liu-liu, membru Parlamentu Nasional, membru governu Timor Leste no Diretór sira  atu husu lisensa ka clearance husi Embaixada Timor Leste iha Jakarta molok hala'o viajen ba Indonezia, liu-liu ba Jakarta.

Ministru Negosiu Estranjeiru no Kooperasaun Dionisio Babo hatete, maske situasaun iha Jakarta hahú hakmatek ona, maibé husu ba membru governu no diretór sira ne'ebé hakarak vizita Indonezia atu husu uluk lai aprovasaun husi embaixada TL iha Jakarta.

"Membru governu sira hamutuk ho ita-nia diretór sira ne'ebé mak atu sai ba li'ur, liu-liu Jakarta, se bele hetan tiha lai clearance, hetan tiha lai aprovasaun husi ita-nia embaixada iha Jakarta mak bele ba," dehan Ministru Dionisio ba jornalista sira hafoin hasoru-malu ho Primeiru Ministru Taur Matan Ruak iha Palasiu Governu, Sesta  (24/05).

Dala barak ukun na'in iha Nasaun Timor Leste gosta ba rai liur liu-liu hala'o vizita ba Jakarta nune'e Dionisio husu ba membru governu no diretor sira atu labele ba nonook atu nune'e bele evita buat balun ne'ebé hotu-hotu la espera.

"Labele ba derrepente de'it, ba nonook de'it depois buat ruma mosu mak foin fó hatene, ida ne'e la di'ak," dehan Babo.

Ba prazu limitasaun viajen ne'e, Ministru dehan, sei akompaña nafatin situasaun iha Jakarta iha semana ida ka rua oin mai.

"Pelumenus to'o iha semana ida ka rua mai ne'e."

Aleinde ba membru governu sira, Ministru husu mós ba membru PN no lider Timor Leste sira seluk atu iha semana hirak oin mai ne'e bainhira hakarak halo viajen husu aprovasaun lai husi MNEK.

"Husu ba ita-nia Na'i-ulun sira hotu, iha Parlamentu ka iha ne'ebé hotu, iha semana ida ka rua ne'e sai ba li'ur karik, favor ida liu husi MNEK par hetan tiha aprovasaun, liu-liu ba Jakarta, clearance husi embaixa iha Jakarta liu husi MNEK mak foin bele halo viajen," dehan nia.

Ba Ministériu balun ne'ebé karik marka ona loron enkontru iha semana hirak oin mai ne'e, Babo dehan, bele husu atu adia ka muda ba loron seluk iha fulan hirak oin mai.

"Se lae husu atu muda tiha ka tunda tiha enkontru ne'e ba fulan seluk," dehan nia.

Kona-ba situasaun atual iha Jakarta, Babo informa, dauduak ne'e situasaun normal hikas ona, maibé nia parte alerta nafatin ba Timor-oan sira iha Jakarta atu kuidadu an.

"Normalmente laiha situasaun ida ne'ebé la kontroladu, iha ne'ebá kontroladu. Ita iha komunikasaun firme ho ita-nia embaixada iha Jakarta."

Babo dehan, embaixada TL iha Jakarta hasai ona mensajen alerta ida ba Timor-oan hotu-hotu ne'ebé daudauk ne'e iha Jakarta.

"Ba diplomata sira, estudante sira, ema moras, Timor-oan ne'ebé sai-tama (Jakarta) se bele tenke kuidadu sira-nia an, labele mete iha ema-nia politika, tuur idaidak iha sira-nia uma, depois kuandu la presiza lalika naran sai ba hamutuk-hamutuk iha fatin  sira ne'e, ema rame-rame ne'e," nia husu.

Nia hatutan, embaixada TL mós husu ba Timor-oan sira bainhira hasoru situasaun apertadu bele kontaktu embaixada hodi fó apoiu.

Hanesan públiku akompaña, durante loron rua nia laran, 21 no 22 Maiu, situasaun iha Jakarta sai manas bainhira mosu asaun anarkizmu iha manifestasaun pasifiku ne'ebé organiza husi apoiante kandidatu Prezidente no Vise Prezidente Repúblika Indonezia, Prabowo Subianto-Sandiaga Salahuddin Uno, ne'ebé la simu ho rezultadu eleisaun Prezidensial.

Tuir rezultadu ne'ebé Komisaun Eleisaun Jeral (Komisi Pemilihan Umum-KPU) Indonezia fó sai iha 21 Maiu madrugada oras Indonezia, Kandidatu Prezidente no Vise Prezidente numeru sorteiu 1, Joko Widodo-Ma'ruf Amin, manan ho 55.5%, no Prabowo-Sandiaga hetan 44.5%.

La simu ho rezultadu ne'e, apoiante 02 halo asaun manifestasaun iha edifisiu Bawaslu (Badan Pengawas Pemilu), iha Timor Leste karik hanesan ho CNE, nia oin. Asaun ne'ebé fofoun la'o ho dame nakfilak sai asaun anarkizmu.

Tuir informasaun ne'ebé Tempo Timor sita husi detik.com, asaun iha 21 no 22 Maiu rezulta ema na'in 6 mate no liu na'in 200 hetan kanek. Polisia Indonezia mós kaptura suspeitu lubuk ida ne'ebé deskonfia sai autór hodi hamosu asaun anarkizmu.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items