Tuir Vise Miniteriu Saúde Bonifácio Maucoli dos Reis katak, Ministériu Saúde inísiu kedas hetan apoiu fundu oioin hodi hakotu moras tuberkulozu iha Timor-Leste.

"MS simu apoiu orsamentu husi Fundu Global ba programa TB hahú iha tinan 2005 no sei kontinua apoiu nafatin. Aleinde ne’e simu mós apoiu husi KOIKA ba faze dahuluk iha tinan 2013 ho montante millaun $2.1," dehan Vise MS iha Ótel Novu Turizmu, Segunda (8/2).

Vise Ministru ne'e dehan, Koika mós reforsa kapasidade diagnoza liuhusi konstrusaun ba laboratoriu Bio-Seguransa nivél tolu atu halo teste sensitividade ai-moruk TB nian, depois Koika mos investe faze daruak husi periodu 2020-2024 hodi haforsa kapasidade detesaun kazu no jestaun ba tratentu iha komunidade.

"MS mós hetan apoiu husi ION, Klibur Domin, Klinika Bairo-Pite, Maluk Timor, Caritas Dioazana Dili, Fundasaun Alola no Klinika ba NGO sira seluk tan ne’ebé iha kooperasaun ho Ministeriu Saude ba implementasaun Programa TB ih Timor-Leste," Bonifacio informa.

Iha fatin hanesan embaixadór Repúblika Koreana Lee Cing Bun hateten, kontribuisaun ba Timor-Leste hodi luta atu bele elimina TB desde 2016 ne'ebé servisu hamutuk ho MS no partisipasaun diagnostika manajamentu TB ne'ebé la'o hela.

"Projetu ba etapa primeiru ne'ebé remata iha 2016 iha rezultadu boot rua ne'ebé ha'u presiza informa ba imi. Primeiru harii laboratóriu ho estandar TB iha laboratóriu nasional Timor-Leste nian, Segundu liuhusi treinamentu destaka profesionais TB Husi korea ne'ebé fó ona treinamentu ba profesionál saúde tomak iha TL," dehan Nia.

Embaixadós ne'e afirma, husi asosiasaun TB Korea sei fornese Mobile TV Live streaming inklui atu haforsa kapasidade pesoál saúde no médiku sira hodi kombate preziléziu sosiál kona-ba TB nian nomós hasa'e partisipasau komunidade nian hodi luta asoru TB Iha Timor-Leste.

"Governu Korea sei kontinua apoiu TL iha área saúde ninian", dehan Embaixador.(*)