Nia parte simu informasaun husi entidade balun, katak la satisfaz ho prosesu selesaun ne'e tanba estudante balun valór boot maibé la admitivu iha UNTL.
Nia husu Ministériu Ensinu Superiór, Siénsia no Kultura (MESSK) atubele halo klarifikasaun ruma ba kestaun ne'e.
"Ha'u hanoin oportunidade ida'ne'e señor Ministru tenke pasa lai informasaun ida-ne'e ba MESSK, atubele fó klarifikasaun ida, ba prosesu de selesaun ba todos os rejime ninian (rejime hotu-hotu) para populasun bele iha klarifikasaun ruma kona-ba prosesu ne'ebe mak señor ministru hala'o hodi bele halo selesaun ba estudante sira, liuliu ligadu ba rejime jerál ninian," dehan nia iha plenária Parlamentu Nasionál, segunda (8/2).
Iha fatin hanesan, Deputadu Bankada FRETILIN, David Dias Ximenes 'Mandati' husu karik bele halo took investigasaun ba irregularidade ne'ebé kada tinan mosu iha prosesu selesaun ba estudante foun atu asesu ba UNTL.
"Ha'u mos hakarak husu de'it, karik bele la'ós atu kondena ema ruma, maibé karik bele ita investiga took, para haree irregularidade sira-ne'e para ita kurije tiha buat sira ne'e," dehan nia.
Nia preokupa prosesu ezame administrasaun ohin loron nian, ema balun ne'ebe iha valór 40, la admitidu fali, balun ne'ebé valór 30 itál, sira admitidu fali iha UNTL.
"Balun halo opsaun hakarak tama iha fakuldade medisina jerál ho valór 51, maibé derrepente de'it muda tiha ita-nia estudante ne'e ba enjeñaria ne'e la motivadu ona," nia kestiona.
Purtantu, Ministru ba Asuntu Parlamentár no Komunikasaun Sosiál (MAPKOMS), Francisco Jerónimo rejista ona no sei enkamiña preokupasaun ne'e ba Ministru Longuinhos dos Santos.(*)