Print this page

Problema Elektrisidade Mate, PM Taur Nia Ahi mós Piska-piska Featured

Pontador prepagu ne'ebe hatudu elektrisidade mate nune'e numeru mos lakon hotu (22/05) Pontador prepagu ne'ebe hatudu elektrisidade mate nune'e numeru mos lakon hotu (22/05) Foto especial

Tempotimor (Dili) - Durante semana hirak ikus ne’e problema ahi lakan-mate mosu fila fali. Situasaun ida ne’e fó hanoin fila fali kona-ba fenomena “Ahi Mate Permanente (AMP)” ne’ebé konsege mosu iha governasaun Aliansa Maioria Parlamentar (AMP) iha tinan hirak liu ba.

Iha loron hirak ne’e nia laran, Komunidade sira iha kapital Dili preokupa ho ahi ne’ebé mate-lakan kuaze sai regular tiha.

Komunidade ida iha area Bebonuk, Sergio da Costa (35) lamenta tanba dezde horisehik, Kuarta (22/05), sira-nia ahi mate to’o agora.

“Ami-nia ahi iha Segunda (20/05) mate, depois moris fali, iha Tersa (21/05) moris, mai fali Kuarta loraik mate no to’o ohin seidauk lakan,” dehan Sergio iha nia hela fatin, Bebonuk, Kinta (23/05).

Aleinde Sergio, iha mós komunidade lubuk seluk ne’ebé preokupa ho situasaun ne’ebé mosu. Balun mós hato’o sira-nia preokupasaun iha media sosial Facebook tan ba ahi mate kauza estrgaus ba sira nia ekipamentus teknolojia, kastigu komunidade kuran bee, labele tein no nono be manas.

Ba problema ida ne’e, Primeiru Ministru Taur Matan Ruak ho diplomatikamente ho oin inocente hatete, situasaun ida ne’e mosu tanba ekipamentu eletrisidade nian barak mak tuan ona.

"Ne'e preokupasaun ida ne'ebé sosiedade tomak nian, inklui ha'u-nia uma mós ahi mate-lakan. Mais ida ne'e liga ba ita-nia sub-estasaun sira ne'ebé material tinan barak ona", dehan PM Taur Matan Ruak (TMR) hafoin hasoru-malu ho Prezidente Repúblika Francisco Guterres Lu Olo iha palásiu preszidensial Bairro-pite, Kinta (23/05/2019).

Atu rezolve problema ne’e, Xefe Governu ne’e dehan, ekipa husi Ministériu Obras Públika serbisu maka’as hela atu oinsa bele hadia sistema hirak ne’e.

"Ministériu Obras Públika sei atualiza sistema sira ne'e, hadia fiu sira, postu sira, parte ne'ebé presiza par depois eletrisidade ne'e kontinua funsiona di’ak liu," dehan PM Taur.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items