Tenderizasaun iha RTTL,ep: Entre Benefisiu ba “Kolega” no Kapasidade Lideransa Featured

Parte RTTL,ep hamutuk ho kompania konkorentes sira hala'o vizita ba iha Kutulau hodi hare fatin konstrusaun torre foun ninian Parte RTTL,ep hamutuk ho kompania konkorentes sira hala'o vizita ba iha Kutulau hodi hare fatin konstrusaun torre foun ninian Foto Khusus

Tempotimor (Dili) - Radio Televizaun Timor Leste, empreza públiku (RTTL,ep) iha hakarak atu dezenvolve an hodi oferese serbisu ne’ebé di’ak liu ba públiku. Pasu ida ne’ebé lideransa RTTL,ep halo mak hadi’a prosesu transmisaun rede ba povu Timor Leste tomak liu husi harii torre foun iha Kutulau. Maibe hari'i torre foun hamosu nakonu ho deskonfianca foun ne'ebe ke automatikamente sempre nega husi ulun bo'ot sira iha RTTL,ep.

Atu implementa ida ne’e, RTTL,ep loke tenderizasaun ba kompaña sira ne’ebé iha interese no kapasidade hodi sosa material no halo konstrusaun ba torre foun iha area Kutulau, Postu Administrativu Bazartete, Munisipiu Likisa.

Maibé, mosu deskonfiansa ba prosesu tenderizasaun ne’e, tanba konsidera mosu nepotizmu. Kompaña ne’ebé mak manan tenderizasaun ne’e nu’udar “relasaun familia ou kolega” husi membru governu balun. Ida ne’e halo emprezariu balun preokupa, tanba konsidera RTTL,ep la fó oportunidade ba sira atu hato’o sira-nia lamentasaun.

Kestaun seluk ne’ebé sai preokupasaun mak espesifikasaun material ne’ebé RTTL,ep fó. Ezemplu, besi ba torre ne’ebé atu harii ho medida 10x10, ida ne’e diferente ho medida besi ba torre tuan 20x20 ne’ebé iha ona.

Problema ne’ebé iha mak parte RTTL,ep rasik la hatene espesifikasaun material ne’ebé sosa, kalkulasaun ba durasaun no kestaun teknika sira seluk. 

“Ha’u laiha koñesimentu kona-ba tekniku sira ne'e. Prosesu tender ne'ebé halo ami-nia ekipa mós konsulta ho ADN no sira mós dehan sira-nia rekursu ba analiza kualidade besi ne'e laiha,” dehan Prezidente Konsellu Administrasaun Francisco da Silva Gary.

Preokupasaun boot mak na’in husi projetu ne’e rasik la hatene saida mak nia hakarak husi projetu ne’e, importante mak gasta hotu osan ne’ebé aloka, atu di’ak ka aat depois mak haree.

Relasiona ho preokupasaun no akuzasaun hirak ne’e, jornalista Tempo Timor (JTT) halo intervista eskluzivu ho Prezidente Konsellu Administrasaun (KA) RTTL,ep, Francisco da Silva Gary (FSG), iha nia knar fatin, Kaikoli, Sesta (09/05).

JTT: Señor prezidente, foin lalais ne’e ita-boot sira loke tenderizaun ba projetu rua, ida mak projetu kona-ba harii torre no ida fali mak kona-ba seguransa nian. Ha’u hakarak husu uluk kona-ba projetu harii torre iha Kutulau, iha espesifikasuan ne'ebé ita-boot sira fó sai medida besi ba torre ne’e 10x10 ne’ebé la hanesan ho torre tuan?

FSG: Sim, ida ne'e perguntas ne'ebé mak tekniku demais liu. Ha’u laiha koñesimentu kona-ba tekniku sira ne'e. Prosesu tender ne'ebé halo ami-nia ekipa konsulta mós ho ADN no sira mós dehan sira-nia rekursu ba analiza kualidade besi ne'e laiha, ho nune'e sira rekomenda para loke konkursu ba públiku atu tuir kompetisaun, inklui ami husu tuir kualidade besi nian ne'e, entaun ida ne'e sai mós preokupasuan ba ami tanba ami laiha skill ba área ida ne'e nian. 

JTT: Karik tekniku sira esplika ona ba ita-boot kona-ba forsa anin iha Kutulau, tanba bainhira kualidade besi la di’ak bele fó impaktu mós iha futuru, hanesan torre bele tohar.

FSG: Sim, torre ne'ebé mak agora atu harii ne'e bazeia ba tekniku Xina sira, sira mak halo survei uluk iha ne'ebá depois ninia dezeñu sira ne'e sira rasik mak prepara hotu de’it, ne'ebé ami só halo tuir de’it buat ne'ebé mak sira rekomenda hela mai, halo tuir de’it. Entaun perguntas ne'e tekniku demais ha'u laiha koñesimentu atu hatan, maibé jeralmente ita hakarak harii torre ida ne'ebé nia durasaun kleur no seguransa sira ba torre ne'ebá.

JTT: Se ita hakarak torre kleur, karik presiza kavanazen ne'ebé forte, maibé hanesan ohin ita-boot dehan falta rekursu, se nune’e saida mak ita-boot halo atu kontrola kualidade?

FSG: Sim, ida iha fulan Maiu nia rohan ekipa tekniku husi Xina sei mai par atu check bazeia ba kualidade besi sira ne'ebé mak iha, depois mak sira rekomenda par ba oin, karik sira rekomenda besi ida ne'ebé mak kualidade di’ak liu par atu instala torre foun sira ne'e iha futuru.

JTT: Señor prezidente, emprezariu sira ne’ebé partisipa iha konkursu ne’e hatete katak RTTL,ep la fó oportunidade ba sira atu bele hato'o sira-nia protesta.

FSG: Tuir informasaun ne'ebé mak aprovizionamentu hatete mai ha’u, sira esplika tiha ona ba kompañia sira katak 15 dias depois avizu sai sira bele mai hato'o sira-nia lamentasaun ba aprovizionamentu ninian, maibé iha momentu ne'e ha’u mós la hatene, sira informadu ka lae, maibé tekniku sira esplika mai ha’u katak bainhira rezultadu avizu iha ona sei iha 15 dias par ita-boot sira hato'o ita-boot sira-nia lamentasaun. 

JTT: Signifika projetu ne’e laiha konlitu interese hanesan buat ne’ebé balun akuza?

FSG: Ha’u la hatene iha konflitu interese nian, mais ita-nia intensaun mak ita hakarak torre ne'ebé mak bele harii ho nia kualidade di’ak no utiliza ba tinan naruk, no harii iha fatin ne'ebé mak bele seguru bazeia ba rekomendasaun ne'ebé mak tékniku Xina sira mai survey tiha ona ne'e. 

JTT: Señor prezidente, ami hakarak husu fali kona-ba tender seguransa ninian. Balun dehan iha problema oituan, ne'e loos la lae?

FSG: Kona-ba problema seguransa ne'e laos boot, maibé buat ne'ebé mak ami iha mak prevé orsamentu ba seguransa ne'e kiik liu ba kompañia nia kuotasaun ne'ebé mak sira hatama mai, ida ne'e mak sai hanesan parte ida ne'ebé mak ami sei tetu, karik iha tempu badak ne'e ami laiha ekipa ida ne'ebé mak halo avaliasaun no la hetan desizaun ida ne'ebé mak bele asegura ba funsionamentu seguransa iha teritoriu Timor laran tomak, ami hanoin para atu re-anunsiu fali, ba publiku par atu tuir fali. 

JTT: Maibé iha informasaun balun katak ita-boot sira informa ona ba kompaña balun katak sira mak manan ona tender?

FSG: Ita seidauk informa maibé ita iha intrevista ita bolu kompaña rua ne'ebé mak sira iha fasilidade no iha kapasidade finanseiru, entaun ita konvida sira mai intrevista ho sira, maibé depois ita-nia komunikasaun ho sira ita hetan informasaun katak ida ne'ebé mak ita haree katak bele par atu apoiu ba seguransa nian. Sira dehan katak orsamentu ne'ebé mak RTTL prevé ne'e la sufisiente par atu kobre númeru seguransa sira ne'ebé mak hala’o serbisu iha teritoriu Timor laran tomak, ne'ebé tau matan ba transmiter sira ne'e. 

JTT: Maibé kompaña sira balun hatete katak presu ne'ebé sira oferese ne’e bazeia ba lei trabaladór tan ne’e sira lakohi viola, no RTTL,ep hanesan obriga sira atu viola lei.

FSG: Ha’u hanoin sira iha direitu atu koalia ida ne'e, importante mak ita asegura direitu traballadór ne'ebé mak halo knaar iha area seguransa ne'e, tanba ita-nia lei mós proteze ida ne'e. 

Ita konsidera no tetu buat ne'ebé mak sira hatete, mais tanba kondisaun ne'ebé mak ami iha, ami sei tetu atu re-anunsiu tender ne'e ba públiku, karik iha kompania seluk ne'ebé mak interese par atu konvense RTTL, tanba ita-nia preokupasaun boot mak kuadu kompañia sira ne'ebé mai ho kapital ne'ebé mak la konvese RTTL. 

Ita hatene katak fundu tranferesia husi governu mai iha RTTL ne'e mós tarde entaun ida ne'e mós implika pagamentu salariu ba seguransa sira ne'ebé mak halo ninia serbisu iha fatin importante RTTL nia hanesan hein torre no transmiter sira.

JTT: Obrigadu señor prezidente!

Rate this item
(0 votes)
Last modified on Wednesday, 22 May 2019 16:16
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com