Bankada CNRT anunsia sira nia pozisaun hodi hato'o pedidu fisklizasaun abstrata kona-ba Orsamentu Jerál Estadu (OJE) 2021 ba Tribunál Rekursu tanba konsidera artigu balun inkonstituisionál.

Ho preokusaun ne'e, iha loron 12 janeiru 2021, TR notifika ona Parlamentu Nasional durante loron 30 atu halo rekursu ruma, maibé PPN rasik seidauk bele hatán notifikasaun ne'e tanba seidauk iha konkluzaun.

Sekretaria Meza Parlamentu Nasionál atuál deputada Lidia Norberta deklara,
PPN reprezenta orgaun soberania PN nian, simu ona karta notifikasaun husi tribunal, prazu ba loron 30.

Tuir nia, dadauk ne'e PN seidauk bele responde ba notifikasaun TR nian tanba iha hela faze elaborasun.

"Relasiona ho ezijénsia, pedidu de fiskalizasaun bankada CNRT nian, iha ne'ebá hatete katak durante loron 30, PN tenke fó netik resposta ba notifikasaun ne'ebé tribunál fó, entaun agora faze elaborasaun resposta ne'ebé maka, parlamentu tenke presta submete ba tribunál, sei la'o hela," dehan Lidia liuhusi konferénsia semanál iha PN, Sesta (29/1).

Deputada bankada governu ne'e mós dehan, mezmu faze elaborasaun seidauk remata, maibé nia fiar katak, PN sempre buka atu kumpri nafatin prazu loron 30 ne'e.(*)