Maibe tuir Ana Paula importante mak bainhira atu kriminaliza sidadaun sira-ne'ebé tama ilegalmente iha fronteira mak ho loloos.
Ana akresenta durante ne'e governu liuhusi parte seguransa mak iha dadus atividade ilegál iha fronteira, inklui mós dadaun ne'e propagasaun surtu covid-19 mos númeru aas dadaun iha Atambua, Indonézia.
Tanba ne'e, desizaun ne'ebé governu foti hanesan parte prevensaun husi ameasa covid-19 iha Timor-Leste.
"Duke buat ruma akontese mak ita foin hakfodak, maibé husu para tetu didi'ak. Se karik ida ne'e tuir sira ( governu) bele atu hatán ba prekupasaun ema-nia kona-ba Covid-19 ne'e mai, ne'e depende ba sira, importante mak tenke halo lolos," dehan Ana Paula Marçal ba www.tempotimor.com iha nia kna'ar-fatin, JSMP Kolmera Dili, kinta (28/01).
Ana hatete movimentu ilegál ne'e rasik mós krime ona maibé governu nafatin fó toleránsia, tanba ne'e tuir loloos nu'udar sidadaun di'ak tenke kumpri regra ne'ebé governu hato'o ona, nune'e liuhusi portaun hatudu dokumentu no submete ba kuarentena.
"Tanba covid ne'e, sira (governu) tenki ser halo buat ne'ebé hanesan proteje ita hotu," dehan Ana.
Antes ne'e, Brigadeiru-Jenerál Joao Miranda 'Aluc' konsidera movimentu tama-sai ilegál fo risku tebes tanba relasiona ho surtu covid-19 no husu atu governu fó sansaun disiplinár ida- ne'ebe maka'as ba sidadaun sira tama ilegál iha fronteira.
Iha momentu seluk mos Ministru Defeza, Filomeno Paixão de Jesus sujere atu hamosu task force ida involve institusaun relevante seluk tanba konsidera defeza no seguransa nasionál iha fronteira la'ós responsáblidade husi parte defeza no interiór nian de'it maibé ministériu seluk hanesan finansa, saúde, estatal no mós sidadaun sira.(*)