Iha loron 12 fulan junu tinan 2019 governu aprova despaixu husi Primeiru Ministru hodi nomea Francisco Kalbuady Lay hanesan autoridade nasional ba Expo Dubai 2020 nian.

Tuir planu antes ne'e, loloos Expo ne'ebe realiza iha Dubai, Emiradus Arabes Unidus hahu loron 20 fulan outubru tinan 2020 to'o loron 10 fulan abril tinan 2021, maibe tanba pandemia Covid-19 la konsege,entaun muda fali mai tinan 2021.

Nune'e, Konsellu Ministru aprova ona projetu rezolusaun governu nian kona-ba alterasaun daruak ba rezolusaun governu numeru 20/2019 loron 14 fulan junu, ne'ebe nomeia autoridade nasional ba expo dubai.

Ministru Prezidensia Konsellu Ministru Fidelis Leite Magalhaes afirma, ho alterasaun ne'e, Ministru Turizmu Komersiu Indusdustria (MTKI), Jose Lucas do Carmo da Silva subtitui Francisco Kalbuady Lay.

Projetu rezolusaun governu nian halo alterasaun daruak ba rezolusaun numeru 20/2019 ne'e aprezenta husi Ministru Turizmu Komersiu Indusdustria MTKI Jose Lucas do Carmo da Silva no ohin hetan ona aprovasaun husi Konsellu Ministru.

"Sr. Ministru rasik maka asumi kargu hanesan autoridade, Ministru Turizmu Komersiu Indusdustria nia mos akumula funsaun hanesan autoridade nasional ba expo dubay 2020, ho nune'e nia troka Francisco Kalbuady Lay", informa Nia liu-husi konferensia imprensa hafoin reuniaun Konsellu Ministru iha palasiu governu, kuarta (27/01/21).

Antes ne'e, iha loron kuarta fulan agostu tinan 2020, Ministru Turizmu Komersiu Indusdustria MTKI Jose Lucas do Carmo da Silva dehan, Francisco Kalbuady Lay la hatama karta rezignasaun husi autoridade nasional Expo Dubai, nune'e governu liu-husi reuniaun Konsellu Ministru hodi desidi hasai tiha.

"Durante ne'e governu husu atu senor Kalbuady Lay hatama karta rezignasaun ruma, maibe hein to'o ohin loron, entaun lideransa ho Primeiru Ministru sei hasai liu-husi Konsellu Ministru hodi delega fali lideransa foun", Informa momentu neeba.(*)