Formasaun ne'e rasik hala'o ho tema "Eleva koñesimentu dirijente no funsionáriu públiku SEKoop hodi hasa'e kualidade servisu iha administrasaun públika".

Sekretáriu Estadu Kooperativa (SEKoop), Elizário Ferreira konsidera formasaun ne'e importante atu haree ba karreira funsionáriu sira-nian iha funsaun públika hodi hasa'e koñesimentu iha servisu tékniku sira.

"Ema seidauk sente kuandu nia seidauk to'o iha nível ida topu. Nia kuandu to'o iha nível topu, nia foin sente dehan katak formasaun ne'e bele duni no di'ak duni", diskursu SEKoop, Elizário Ferreira, baunhira loke abertura formasaun ba funsionáriu sira Salaun Esperansa, Aldeia Săo José Aimeti-Laran, Suku Komoro, Postu Administrativu Dom Aleixo, Munisípiu Dili, tersa (26/01).

Nia dehan, atu halo servisu auditória ida, la'os fásil, maibé bainhira servisu sira iha kooperasaun di'ak ba malu, servisu hotu-hotu bele no sempre realiza ho di'ak.

"Iha servisu kooperativa, kuandu hetan problema ruma, hadi'a kedas, labele hein ema mai mak atu hadi'a fali", nia fó hanoin.

Elizário dehan, iha prosesu edukasaun no prosesu kona-ba koñesimentu tenke dominante.

Nia hatutan, bainhira iha prosesu edukasaun no formasaun ninian, ema ne'ebé toman halo di'ak, nia sei la rekoñese ó ema di'ak, maibé nia sei sente bainhira nia to'o iha leten.

"Tanba ida ne'e, ita promove nafatin formasaun, ema hotu-hotu sei sente katak prosesu formasaun ne'e di'ak ba karreira funsionáriu ida hanesan funsaun públiku no atu haree ba nesesidade tékniku sira-nian", tenik nia.

Entretantu, Inspetór Gabinete ba Inspesaun ho Auditória iha SEKoop, Henrique de Oliveira Ximenes hatutan, formasaun ne'e hala'o ba funsionáriu sira iha SEKoop nia laran kompostu husi na'in-88 hodi eleva koñesimentu iha área kontrolu internu ninian.

Nia hateten, formasaun ne'e atu funsionáriu iha koñesimentu kle'an liu kona-ba kontrolu internu nune'e servisu sira bele la'o ho di'ak sai transparénsia liután.

"Objetivu prinsipál mak ne'e, atu hasa'e funsionáriu ho kargu dirijente sira atu hatene lei sira-ne'ebé vigora ona ihaTimor ne'e, hodi nune'e sira bele hala'o kna'ar ho di'ak, no serve povu mós la'o ho di'ak," nia katak.

Entretantu, formasaun ne'e rasik halao durante loron rua hahú husi 26 to'o 27 fulan janeiru ne'e. Oradór ba formasaun ne'e mak SEKoop, Elizário Ferreira no Inspetór Jerál Estadu (IJE), Francisco de Carvalho.

Tuir planu, iha formasaun ba loron daruak nian, sei marka prezensa husi oradór sira mak hanesan, Komisaun Funsaun Públika (KFP) no Komisaun Antí Korrupsaun (KAK).(*)