Print this page

Kondekorasaun ne’ebé “La Vale” ba Veteranus Featured

Veteranus sira no familia herois sira ne'ebe atu simu kondekorasaun husi Prezidente da Republika, Francisco Guterres 'Lu-Olo' iha hela formatura durante selebrasaun aniversariu Restaurasaun Independencia ba 17, iha Palasiu PR Ai Tarak Laran, (20/05) Veteranus sira no familia herois sira ne'ebe atu simu kondekorasaun husi Prezidente da Republika, Francisco Guterres 'Lu-Olo' iha hela formatura durante selebrasaun aniversariu Restaurasaun Independencia ba 17, iha Palasiu PR Ai Tarak Laran, (20/05) Foto Media Prezidencia da Republika

Tempotimor (Dili): Veteranus hamutuk na’in 25 iha komemorasaun loron restaurasaun independensia ba dala 17 simu Kolar Orden Timor Leste no Medalla Orden Timor Leste.

Entre veteranus na’in 25 ne’e, nain 10 simu Kolar Orden Timor Leste no na’in 15 mak simu Medalla Ordern Timor Leste.

Maske sente kontente ho rekoñesimentu husi estadu ba sira-nia sakrifisiu, maibé veteranu sira seidauk kontente tanba konsidera simu de’it besi ne’ebé la vale buat ida.

Kondekoradu ida, Fernando Bere-Du'u Gusmão dehan, kondekorasaun ne'ebé PR lori estadu nia naran kondekora ne'e la sufisiente, tanba Medalla Ordem Timor Leste ne'ebé veteranu sira simu ne'e besi de'it. 

"Prezidente ohin fó kondekorasaun ba ami ne'e sente kontente maibé seida'uk to'o, tanba ami konta ba to'o tinan 24 ne'e ami sente seida'uk to'o, tanba ami iha ai-laran katuas hotu ona, depois tuun fali mai vila laran mak fó buat hanesan ne'e ami atu halo saida?”.

“Ne'ebé ha'u-nia hakarak se bele boot sira hanoin oinsa mak veteranu sira katuas hotu ona, liman-ain tohar hotu ona ne'e halo oinsa mak veteranu nia oan moris di'ak, ne'e sira tenke hanoin tan ida ne'e. Tanba ba ami ida ne'e la sufisiente, tanba ne'e besi ida, ami labele han ida ne'e. Tanba ida ne'e mak ha'u dehan seida'uk to'o", dehan Bere-Du'u hafoin simu kondekorasaun iha selebrasaun tinan 17 restaurasaun independensia iha palasiu Prezidensial Nicolau Lobato, Bairro-pite, Dili, Segunda (20/05/2019).

Entretantu, Prezidente Repúblika Francisco Guterres Lú Olo iha komemorasaun loron restaurasaun independensia ne’e kondekora veteranus na’in 25 ba sira-nia dedikasaun ba luta libertasaun nasionál.

"Iha selebrasaun 20 Maiu tinan ida ne’e, Prezidente Repúblika ho Estadu Timor Leste nia naran, deside rekoñese no valoriza veteranu 10 ho Kolar Orden Timor Leste no 15 ho Medalla Orden Timor Leste ba sira-nia dedikasaun eskluziva ba ita-nia luta Libertasaun Nasionál," deklara PR Lu Olo iha nia diskursu iha palásiu prezidensial Nicolau Lobato Dili, Segunda (20/05/2019).

Nia dehan veteranu sira ne’e husik buat hotu-hotu. Husik sira-nia uma, sira-nia bein-estar no sira-nia família, hodi hako’ak mehi koletivu ida.

“Família-sira simu sira-nia sakrifísiu ho ksolok no domin.  Infelizmente, husi lista rua nulu resin lima ne’e, nain sanulu resin lima mak labele hatutan misaun boot veteranu sira-nian, iha tempu ukun-an ne’e hodi kore Povu husi kiak no mukit. Tamba sira mate ona,” dehan Lu Olo.

Veteranu sira ne'ebé hetan kondekorasaun mak: José Agustinho Sequera "Somotxo", Orlando Jerónimo da Costa, João Cabral, António da Costa, Lorenço da Silva Freitas, Armando Viegas, Saudozu Reinaldo Freitas Belo, Saudozu Afonso Henrique Monteiro, Saudozu Venancio Ramos Amaral Bras, Saudozu Virgilio dos Anjus, saudozu Felisberto Maria dos Santos, saudoza Etelvina Fernandes Belo, saudozu José Alvano Maria da Costa, saudozu Diogo Bonaparte Soares, saudozu Januário Xavier, saudozu Filomeno da Silva, saudozu Roberto da Neves, saudoza Rosa de Zinha Xavier, saudozu Cesário Ximenes, saudozzu Domingos Pinto, no saudozu Agustinho Sarmento.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items