Nia konsidera, ho polítika governu nian ne'ebé halo prosesu levantamentu tarde difikulta pagamentu saláriu no vensimentu ba funsionáriu públiku sira.

Deputadu Bankada Opozisaun ne'e simu informasaun husi funsionáriu balun, katak to'o agora seidauk simu saláriu.

"Saaláriu funsionáriu to'o agora seidauk tama, funsionáriu sira triste no balun tanis, foin lalais señor ministru Fidelis hatete ona katak osan ne'e agora funan barak iha ita-nia Banku Federál Amérika, ne'ebe seidauk nesesáriu, tanba ita-nia kofre estadu osan sei iha," dehan nia iha Plenária Parlamentu Nasionál, tersa (26/1).

Nia haktuir argumenta, loloos ne'e iha loron 20 ne'e funsionáriu hotu-hotu tenke simu ona saláriu maibé to'o oras ne'e la akontese.

"Ita-nia funsionáriu sira-ne'ebé mak ho saláriu $.100 itál $115, $200, $300, sira laran moras, tanis, tanba sira-nia saláriu to'o agora seidauk tama iha sira-nia konta bankária," nia kestiona.

Nia husu governu atu hadi'a problema saláriu no vensimentu funsionáriu sira-nian.

Deputadu Bankada CNRT ne'e preokupa asuntu osan, tanba dala barak membru governu iha fatin-fatin hatete maske osan laiha maibé sira dehan osan iha hela de'it.

"Sei iha funan mak ita ba ku'u lori mai ka sei tasak tán mak ita lori mai. Ida-ne'e fila ba ita boot sira atu haree didi'ak ida-ne'e, para nune'e labele prezudika fali ita-nia mákina estadu," nia dúvida.

Hatán ba kestaun ne'e, Ministru ba Asuntu Parlamentár no Komunikasaun Sosiál (MAPKOMS), Francisco Martins Jerónimo haktuir, preokupaaun hirak ne'ebé deputadu sira levanta, governu rejista ona no sei enkamiña ba ministériu kompetente.(*)