Formasaun ne'ebé hala'o durante loron rua ne'e, hahú husi dirijente kooperativa sira iha munisípiu nomós nasional nian atu bele eleva liu tan sira nia koñesimentu iha nível formadór nee'bé hetan avalia direta husi Institutu Nasional Maun-de-Obra (INDMO).

Iha serimónia enseramentu ne'e, Sekretáriu Estadu Kooperativa (SEKoop), Elizário Ferreira hatete, formasaun ne'e sei la to'o de'it iha funsionáriu na'in 54 ne'e, maibé sei iha nia kontinuasaun ba funsionáriu sira hotu iha tinan ida sei hala'o ba dala-rua.

"Sei iha formasaun ba ita-boot sira, ba oin, ita kada fulan 6 sei halo avaliasaun entre formadór sira hotu para ita bele hasa'e ita nia nivel formadór ne'e", SEKoop, Elizário Ferreira hateten iha nia diskursu durante ensera formasaun iha Fundasaun Hanai Malu (FHM) Lanud Bairru Pite, (22/01).

Elizário promete, nia sei konvida nafatin INDMO hanesan sira nia parseria, hodi nafatin fó apoiu sertifikasaun ba nia funsionariu sira nivél nasional ne'ebé kompetente.

"Obrigadu barak ba INDMO, ne'ebé mak loron rua ne'e bele husik tempu mai partisipa iha ne'e", dehan nia.

Reprezentante husi INDMO, Ofisial Programa Kualifikasaun Nasional, Arlindo da Costa hateten, prosesu formasaun ne'ebé halao ona, sai hanesan prosesu inísiu ida ba SEKoop hanesan atu prepara ka kria atu bele define Ita-boot sira nia kareira ne'e ba iha nivel sira maka determina tiha ona.

"Ba nível tolu ho haat, ha'u hanoin ba Ita-boot sira ladun kestaun tanba rezultadu prelemináriu ne'ebé exelénsia publika horseik, Ita-boot sira ne'ebé aprezenta horseik ne'e, hotu-hotu passa, ne'e signifika katak Ita-boot sira merese atu ba sai formadór ninian", dehan Arlindo.

Maske nune'e, durante halo avaliasaun ba formasaun ne'e, sira nota iha modelu aprezentasaun husi funsionáriu sira hanesan fali aprezentadór, tuir loloos tenke sai hanesan ema formadór duni.

"Simplesmente ne'e ema komprende ka lae, saida mak ita koalia ne'e. Esplika nee klaru ka lae, ida ne'e mak prinsipal liu kompara ho lian ida ne'ebé mak boot ne'e", nia esplika.

Kona-ba voice control, nia dehan, tenke iha ligasaun ho prezensa bainhira hamri'ik iha oin ne'e, tanba iha relasaun mós ho matéria.

"Ida ikus liu, iha ligasaun ho Ita-boot sira ninia matéria aprezentasaun", hateten nia.

Maske nune'e, rezultadu final husi selesaun teste ba nivel formadór ne'e parte INDMO sei halo tan análiza hafoin mak aprenta hikas rezultadu ba Exelénsia SEKoop.(*)