Vise-Presidente CPN-CNRT Virgílio Smith, lamenta ho deklarasaun Sekretáriu Jerál FRETILIN, ne'ebe nia hasai molok sai husi Ministériu Públiku.
Virgílio Smith fó hanoin ba Ministériu Públiku atu komprende tanba CPN husi partidu CNRT, órgaun koletivu no iha desizaun hotu-hotu, responsável liu mak Prezidente CPN, Kay Rala Xanana Gusmão.
Nia afirma, bankada parlamentár CNRT implementa polítika husi Partidu CNRT, liuhusi programa sira- ne'ebé hasai iha kongresu nomoos implementa desizaun husi órgaun másimu partidu nian mak Komisaun Polítika Nasionál.
"CPN hasai desizaun katak Prezidente CPN, Kay Rala Xanana Gusmão mak tenke ba hatán nu'udar arguidu iha Tribunál," Virgílio Smith informa liuhosi konferénsia imprensa, iha sede CNRT, Bairro dos Grilhos, Dili, sábadu ne'e.
Virgílio esplika, membru CPN sira seluk no deputadu 21 husi bankada parlamentár CNRT iha Parlamentu Nasionál, sei uza maka sira-nia direitu ba silénsiu tuir artigu 60º, alinea c iha Kódigu Prosesu Penál.
Membru CPN ne'ebé hola parte iha reuniaun extraordinária ida-ne'e mak Kay Rala Xanana Gusmão, Prezidente partidu CNRT no Presidente CPN, Vise Presidente CPN, Virgílio Smith, membru sira mak hanesan Tomás do Rosario Cabral, Bendito Freitas, Francisco da Costa, Jacinto Rigoberto, Francisco Costa Guterres no Jacinto Viegas Roque.(*)