Ministru Prezidénsia Konsellu Ministru (MPKM) Fidelis Leite Magalhães, hatete atividade retiru ne'ebé governu halo ne'e hanesan sekuénsia husi retiru sira anteriór ne'ebe ho objetivu atu orienta di'ak liután servisu ne'ebé membru governu sira iha.

''Ohin, retiru governu ne'e sekuénsia husi retiru ne'ebé governu halo tiha ona dezde iha tinan rua liubá, no kontinua tinan kotuk, no ba tinan foun 2021 nian, ho objetivu atu orienta di'ak liután. Retiru ne'e ajenda hahú ho intervensaun no orientasaun husi Primeiru Ministru,'' dehan nia iha Ministeriu Finansa Aitarak laran, sesta (22/1).

Nia haktuir, xefe orienta membru governu sira hotu, atu bele avansa ho implementasaun programa no ezukusaun orsamentu ne'ebé mak iha tiha ona.

Nia hatutan, iha retiru ne'e parte Ministru Finansa mós ko'alia no halo aprezentasaun kona-bá planu rekuperasaun ekonómiku nian, hodi enkuadra ba membru governu sira hotu.

Iha retivu ne'e halo aprezentasaun kona-bá vijaun jerál, objetivu sira husi inisiativa programa no pakote rekuperasaun ekonómika.

Fidelis esplika, medida ne'ebé governu halo iha faze estabilizasaun ninian nune'e kontribui iha rekuperasaun ekonómika.

Nia dehan, iha rekomendasaun balun hosi Ministru Finansa kona-bá dalan ba oin, dalan ba oin signifika inspira hodi informa programa rekuperasaun ekonómika ne'ebé mak iha.

Nune'e mós avalia fali lala'ok dezempeñu Timor-Leste nian ne'ebé la'o to'o agora.

''Ita tenke halo períodu, iha médiu prazu, no tempu naruk nian ba oin tanba ita hatene katak preokupasaun ba oin mak ita-nia sustentabilidade fiskál, ita-nia fundu minarai, entaun saida mak ita tenke halo para eleva kualidade ita-nia ema nian, no ita-nia sidadaun sira -nia moris, atu nune'e sira bele sai sidadaun hirak ne'ebé mak produtivu," nia katak.

Nune'e mós kontribui ba tempu naruk nian hodi diversifika ekonomia ne'ebé mak bele iha dalan bainhira enfrenta situasaun iha redusaun. (*)