Ministru Prezidénsia Konselu Ministru (MPKM), Fidelis Magalhães hatete, daudaun ne'e governu diha programa lubun ida ne'ebé aprova tiha ona husi Parlamentu Nasionál no promulgadu husi Prezidente Repúblika, maibé moras covid-19 mak impede.

''Ba oitavu governu ida- ne'e ita iha programa, aprovadu husi parlamentu, ita iha orsamentu aprovadu no promulgadu husi prezidente da repúblika, maibé orsamentu vijente, soké ita iha impedimentu ida maka pandemia covid-19 ne'e,'' dehan nia iha salaun Ministériu Finansa, Aitarak laran, sesta (22/1).

Kona-ba planu dezenvolvimentu, nia argumenta, kualkér governu iha hanoin ne'ebé ideal, signifika programa no objetivu sira-ne'ebé governu hakarak atinje, maibé governu presiza rekursu.

''Tanba pandemia ida- ne'e, buat ida ke afeta hotu mundu tomak, inklui mós afeta ba ita- nia rai, entaun ida ne'e hanesan halo prosesu ne'e sempre neineik liu. Husi buat hotu ne'ebé ita hotu hakarak,'' dehan nia.

Nia fo ezemplu, hanesan relasaun ho mobilidade ema nian dadaun ne'e menus, inklui mós importasaun no atividade merkadoria, komérsiu sira mós hetan hotu impaktu, ho tán preokupasaun kona-bá redusaun ba agomerasaun ema, no parseiru sira iha rai liur, komérsiu nian no tantu administrasaun públika mós iha impedimentu.

''Tanba iha rai barak nune'e, wainhira ita atu ativu atividade iha ne'ebá pratikamente paralizadu,'' deklara Fidelis.

Nia haktuir, hanesan públiku tomak hatene, daudauk iha Timor-Leste presiza tebes kooperasaun ne'ebé di'ak ho país sira iha rejiaun, nomós parseiru sira seluk ne'ebé mak sei bele mai kontribui dezenvolvimentu iha rai laran, maibé prátikamente iha nasaun barak iha mundu.(*)