Prezidente Repúblika Francisco Guterres Lu Olo liu husi ninia mensajen iha loron restaurasaun independensia ba dala 17, 20 Maiu 2019, foku mós ninia atensaun ba problema ki’ak iha Timor Leste.

Prezidente Lu Olo hatete, dezde governasaun dahuluk ne’ebé lidera husi FRETILIN, maske enfrenta dezafiu oioin, maibé iha kedas hanoin atu hala’o dezenvolvimentu sustentavel.

PR Lu Olo hatete, maske tinan 17 ona, maibé Timor Leste sei hasoru nafatin dezafiu oioin, liu-liu problema ki’ak.

Lu Olo sita mós dadus katak, to’o ohin loron labarik menus husi idade tinan 14 ho 46% mak sei moris iha liña ki’ak nia okos.

"Ita hahú ukun ho susar oioin. Laiha infra-estrutura bázika, ita-nia rekursu umanu uitoan liu no estadu iha orsamentu kiik liu. Maibé iha kedas hanoin, iha tempu ne’ebá, atu hala’o dezenvolvimentu ekonómiku sustentável, no ho ita-nia kbiit no matenek rasik”.

“Ohin, ita sei hasoru nafatin dezafiu oioin. Dezafiu sira ne’e bele hasa’e risku ba ita-nia estabilidade. Ita-nia ema, rikusoin boot liu Timor Leste nian, sei moris nafatin iha situasaun ki’ak no mukit. Futuru rai ida ne’e nian komprometidu tanba labarik ho otas lato’o 14, 46% moris iha liña pobreza nia okos", dehan PR Lú Olo iha palásiu prezidensial Nicolau Lobato Bairro-pite, Dili, Segunda (20/05/2019).

Xefe Estadu koalia mós kona-ba produsaun, produtividade no kualidade aihan ne’ebé sei menus, no mós taxa dezempregu ne’ebé sei aas tebes.

Tuir dadus survey forsa de Trabalho ne'ebe halo ho kolaborasaun entre ILO, SEFOPE, DFAT no Ministeiru Financas, tinan 2013, hatudu mós katak dezempregu iha Timor Leste ho porsentu (%) 11.

“Maioria joven tenke buka empregu iha rai li’ur tanba falta ai-han,  empregu, bee-moos no eletrisidade ka laiha asesu ba serbisu saúde no tratamentu médiku,” dehan Lu Olo.

Tuir nia, ida ne’e bele sai hanesan fator ne’ebé hamenus pás sosiál no estabilidade.

Ho nune’e, PR Lu Olo afirma ninia hanoin kona-ba diversifikasaun ekonomia ba Timor Leste.

"Maluk barak no ha’u rasik ko’alia bei-beik kona-bá diversifikasaun ekonómika. Ekonomia ida ke diversifikadu ba Timor Leste signifika depende ba agrikultura, indústrias kriativas, manufatura, komunikasaun no teknolojia no produsaun husi empreza sira ho eskala kiik no médiu, ne’ebé mak sei dudu kresimentu, haluan oportunidade empregu no promove rikeza”.

Tuir Lu Olo, diversifikasaun ida ne’e mak sei rezolve problema sira hanesan ki'ak no dezigualdade.

“Ekonomia ida hanesan ne’e sei buras no sustentável no sei depende ba bee-matan oioin, laós de’it ba reseitas husi minarai no gás", Lú Olo afirma.

Hahú kedas husi kriasaun mundu ne’e, agrikultura sai instrumentu importante tebes iha dezenvolvimentu umanidade. Ezemplu husi nasaun barak hatudu ona oinsá agrikultura fó kontribuisaun ba kresimentu ekonomia.

Lu Olo hatutan, agrikultura mós kontribui ba hamenus ki’ak no hamlaha iha nasaun barak, sai bee-matan ba dezenvolvimentu seitór sira seluk no kontribui maka’as ba konservasaun biodiversidade iha fatin-fatin.

PR dehan, iha Timor Leste, liu 70% husi populasaun mak hela iha area rural no kuaze 60% moris husi halo tós, halai natar, kaer ka haki’ak ikan no faan aifuan.

“Maibé, ita-nia produsaun ba han-hemu nian de’it no ladauk orienta ba esportasaun. Ha’u haliis liu ba polítika hasa’e investimentu iha área agrikultura tanba husi rai mak maioria povu hetan rendimentu ba família sira-nia moris loron-loron", dehan xefe estadu ne’e.