Liuhusi Konferénsia Imprénsa, Portavós Komandu Jerál PNTL, Superintendente Xefe, Arnaldo de Araújo informa, durante fulan ida nia laran hahú husi loron 15 to'o 20 fulan ne'e, totál kazu insidente ne'ebé akontese hamutuk 57, violénsia doméstika iha 12, asaltu malu iha kazu 11, baku malu 10 , ameasa iha kazu 4, ofensa integridade fízika simples iha kazu 15, no tuda malu iha kazu hamutuk rua.

"Husi númeru kazu hirak ne'e domina liu mak kazu violénsia doméstika ne'ebé mak akontese iha territóriu Timor-Leste laran tomak", dehan Portavós PNTL iha Komandu Jerál Kaikoli, kinta (21/01).

Nia hatutan, durante semana ida nia laran, PNTL mós rejista kazu asidente hamutuk 40, kompostu husi kanek kmaan iha kazu 24, kanek todan iha kazu 5 ne'ebé durante ne'e akontese to'o ohin loron.

"Mate seidauk iha, ne'ebé mak ami hetan husi diresaun tránzitu nasionál nian", dehan nia.

Maske nune'e, nia dehan, situasaun jerál hakmatek no polísia movimenta 24 oras iha territóriu nasionál.(*)