Nia haktuir, iha tempu invazaun Indonezia nian ema barak fa'an tiha ninia rai privadu ba sidadaun Indonezia sira, nune'e rai ne'ebe husik hela ona estadu mak regula, laiha sidadaun ida fa'an arbiru bainhira laiha sertifikadu ba rai propriedade privadu.
"Ita Timor uluk tempu Indonezia barak fa'an tiha sira nia rai propriu ba ema estranjeiru Indonezia sira, ida ne'ebe fa'an ita nia rain privadu ba Indonezia ne'ebe husik hela, agora estadu Timor-Leste mak regulariza",Mario hateten ba jornalista hafoin sorumutu ho Primeiru Ministru Taur Matan Ruak iha Palasiu Governu, tetsa (19/01/21).
Nia hakarak apela ba Xefe suku sira atu labele fa'an rai estadu ba kualker sidadaun.
"Hau bele hatete ba Xefe suku sira hotu, Xefe suku laiha kompetensia oitoan atu fa'an Rai, tanba Lei la fo dalan ba sira atu fa'an duni", nia apela.
Nia esklarese, fa'an rai ne'e liu-husi prosesu ida, tanba bainhira estadu sidauk fo direitu sertifikadu ba sidadaun ida laiha direitu atu halo kontratu ho kualker se de'it.
"Se ita fo ona direitu sertifikadu ho sira mak, sira mos bele selebra kontratu ho kualker se de'it mak atu hola, ne'ebe Xefe suku laiha kompetensia", nia tenik.
Entretantu, Lei ne'ebe defini Xefe suku laiha kompetensia atu fa'an rai estadu mak, Rejimi juridiku notariadu numeru 3/2005. (*)