Nia haktuir CNRT iha parlamentu nasional hanesan bankada opozisaun ida wainhira halo pedidu fiskalizasaun abstrata ba Orsamentu Jerál Estadu 2021 tanba artigu 150, alínea (e) husi Konstituisaun Repúblika maka fó dalan.
''Bankada CNRT laiha intensaun atu blokeia funsionamentu Governu defaktu nian ka Impede OJE 2021, maibé Bankada CNRT konsidera OJE 2021 viola regra Konstitusionais no Lei Orsamentu bo Jestaun Finanseira. Tanba ne’e maka Bankada CNRT halo pedidu fiskalizasaun abstrata ba OJE 2021,'' deklara Deputadu Patrocínio liuhusi konferénsia imprensa, iha Parlamentu Nasionál (PN) tersa (19/1).
Kona-bá pozisaun CNRT hodi la-partisipa iha diskusaun espesialidade ba OJE 2021 ne'e, nia haktuir, ne'e nu'udar desizaun polítika opozisaun nian ne'ebe bazeia ba rejimentu, no la signifika katak Bankada CNRT labele halo fiskalizasaun abstrata ba OJE 2021.
Nia haktuir, Bankada CNRT iha obrigasaun sei asegura Lei Orsamentu Jerál Estadu ne'e tenke iha konformidade ba Konstituisaun no Lei Orsamentu Jestaun Finanseira.
Patrocínio hatete, daudaun ne'e CNRT submete fiskalizasaun abstrata ba OJE 2021 la’ós tanba dezespera ba ukun, maibé Bankada CNRT defende konstitusionalidade no legalidade OJE 2021 nian. Relatóriu Komisaun A no Komisaun C mós mensiona katak OJE 2021 iha violasaun hasoru Konstituisaun no Lei valor reforsadu sira.
''Tanba ne'e, Deklarasaun Bankada Governu ne’e reflete katak afinál das contas durante ne’e Bankada FRETILIN halo fiskalizasaun abstrata ba OJE 2008, 2009, 2010, 2011, 2018, no 2019 tanba Bankada FRETILIN dezespera ba ukun,''dehan nia.
Kestaun seluk maka bankada CNRT mos hakarak resposta deklarasaun bankada governu ne'ebe alega durante kaer pasta nu’udár Primeiru Ministru, Kay Rala Xanana Gusmão obriga Parlamentu Nasionál ajenda sesaun estraordinária ho plenária taka odamatan hodi impoin aprovasaun ba rezolusaun hodi duni sai majistradu na’in 40 husi Portugal.
Bankada CNRT konsidera ne'e laloos tanba Plenária estraordinária ne’ebé Bankada Governu mensiona ne’e kabe ba kompeténsia Prezidente Parlamentu Nasionál nian, iha altura ne’ebé lidera husi Prezidente Fernando Lasama Araujo.
Nune'e Plenária taka odamatan ne’e halo tanba debate kona-ba interese nasionál, ne’ebé Bankada FRETILIN rasik mós aprova no involve iha debate ida ne’e, inklui fó votu Afavor ba rezolusaun ne’ebé espulsa majistradu sira.(*)
