Sekretáriu Estadu Kooperativa (SEKoop), Elizário Ferreira esplika, objetivu husi enkontru ne'e ko'alia liu kona-ba kooperasaun servisu entre parte rua iha asuntu kooperativa nian.
Nia dehan, razaun SEKoop realiza inisiativa ida-ne'e, tanba nasaun Tailándia, tanba durante tinan sanulu nia laran bainhira sei hanezan dirijente kooperativa nian, nia koñese di'ak tebes Kréditu Union iha Tailándia.
"Sira dezenvolvidu tebes iha Bangkok, tanba ida-ne'e maka reuniaun ida-ne'e atu dezenvolve atividade, liuliu oinsá mak atu fasilita edukasaun formasaun no estudu komparativu ba ita-nia dirijente kooperativa sira, liuliu kréditu union", informa SEKoop, Elizário Ferreira hafoin realiza sorumutuk ho embaixadór Tailándia Ekapol Poolpipat iha Akait, segunda (18/01).
Nia hatutan, objetivu daruak husi enkontru ne'e, oinsá mak atu aprende husi dezenvolvimentu kréditu union Bangkok nian, tanba sira-nia atendimentu ba mikro no empreza ki'ik sira iha nível baze, dezenvolvidu tebes, no asesu kapitál husi kréditu union.
"Tanba ida-ne'e mak, kooperasaun ne'e importante atu la'o, atu nune'e bele aprende ba malu hodi dezenvolve kréditu union no mikro i pekenas emprezas iha ita-nia rain", dehan Elizário.
Embaixadór Tailándia iha TL, Ekapol Poolpipat haforsa, obejtivu nia halo enkontru ho SEKoop, koalia kona-ba apoiu ne'ebé governu Tailándia sei fó ba TL mak iha asuntu formasaun ba kooperativa nian.
"Tanba ami haree sua exelénsia sekretáriu estadu nia iha esperiénsia kleur tebes ba kooperativa, tanba ida-ne'e maka ami hakarak fó tulun liután sira hodi fó treinamentu ba ekipa hotu atu iha koñesimentu liu ba harii kooperativa", dehan nia.
Maske nune'e, nia dehan, tanba mundu enfrenta hela pandemia globál Covid-19, nunee formasaun refere halao ho karáter online ba fasilitadór sira.(*)