Atetude fase liman ne’e, Vise Ministru hatudu liuhusi ninia resposta ba pergunta jornalista sira nian, ne’ebé husu kona-ba novidade husi issue ne’e, hafoin hala’o sorumutu ho Primeiru Ministru (PM), Taur Matan Ruak iha palásiu Governu, Dili, Sesta (15/01).

Vise-ministru Interiór ne’e hateten, issue ezonerasaun Komadante Jerál PNTL, Faustino da Costa, Ministru Interiór mak iha kompeténsia no hatene hodi halo komentáriu.

"Ida ne'e media mak ko'alia. Ha’u la ko'alia tanba ida ne'e la'ós ha'u nia kompeténsia. Ne'e kompeténsia Ministru nian. Alende Ministru interiór nia mós hanesan Primeiru Ministru, nia mak iha kompeténsia ko'alia sobre ida ne'e. Ha’u ajuda sira servisu de'it, depois kuandu buat ruma imi husu ba Primeiru Ministru no Ministru Interior," António Armindo hateten.

António dehan, nia parte la hatene, nune'e nia haruka jornalista sira atu halo konfirmasaun ho Primeiru Ministru no Ministru Interiór, Taur Matan Ruak.

"Ba informasaun ida ne'e ha’u seidauk ko'alia, ha’u la hatene, tanba tenke husu ba Ministru", nia tenik.

Entretantu, iha loron 9 fulan ne'e, bainhira jornalista sira husu kona-ba issue ezonerasaun, Vise Ministru ne’e hatan la ho linguajen diplomasia, no hatan ba los mai los katak, “imi mós hatene ona ka?”.(*)