Prezidente Kooperativa Nurak Sulin Hamutuk, Olivio da Cruz Pinto hateten, durante tinan tolu nia laran, iha progresu bo'ot ba kooperativa ida ne’e, liga ho produsaun ninian, katak, volume ka kuantidade tinan kotuk ninian ne'ebe sira prodús mak kada semana 50 to’o 60 gallon, maibe kompara ho oras ne’e loron ida bele prodús gallon 35 to’o 40.

Olivio hateten, ohin loron mosu mudansa klimátika, no iha posibilidade sei hamenus bee moos, entaun dalan ne'ebe sira uza mak prodús Tasi been sai bee mos atu komunidade bele konsumu.

"Alternativu liu hosi tasi been ita halo nakfilak ba bee moos nunee bele korresponde ba ita-nia situasaun agora," Olivio hateten lia hirak ne’e iha Palasiu Prezidensiál Dili, Tersa (12/1).

Relasiona ho progresu ba kooperasaun nian ne'ebé la'o ho diak tebes, maka sira mai hato'o sira-nia koñesimentu ba sistema ninian ba Prezidente Repúblika oinsa husu mós Prezidente Repúbika nia apoiu kona-ba sira-nia koñesimentu tanba rezultadu agora ne'e sira la estuda iha nasaun seluk, maibé sira estuda deit iha Universidade Nasional Timor Lorosa'e (UNTL).

"Nai Prezidente Responde katak, sei tau prioridade ba kooperativa refere hodi hare mós iha futuru maski Prezidente hateten nia la'ós ezekutador, maibe Prezidente sei nafatin tau prioridade tanba ida ne'e ba Interese komun no ba povu Rai doben ida ne'e," nia esplika.

Nia haktuir, Grupu ne'e hahu nia ezistensia iha tinan 2017 husi ne'eba mai Lansamentu iha 2019, ohin loron sira bele hetan formasaun legal husi parte kooperativa nian no grupu ne'e ezisti ho ema na’in 3, segundu ema na’in 8 , tuir tan amenta tan kuantidade ema na’in 25.

"Ohin loron ne'e produs besik rihun, agora dadaun lori ona ba supermarket no kios kiik sira ne'ebe besik", nia haktuir.

Gallon ne'ebe kooperativa Nurak Sulin Hamutuk produs ho Galon marka Likisa-Imou. (*)