Hanesan publika iha midia online Vietnam Plus, Vise Primeiru Ministru no Ministru Negosiu Estranjeiru Vietname, Pham Binh Minh dada lia ho Ministra Negosiu Estranjeiru no Kooperasaun (MNEK) Timor Leste nian, Adalgisa Albertina Xavier Reis Magno, via videoconferencing iha loron 12 Janeiru 2020.
Iha dadalia ne’e MNEK Timor-Leste kongratula Vietname nia sucesu bainhira lidera ASEAN iha 2020 espesialmente iha momentu asina Regional Comprehensive Economic Partnership (RCEP) no mos agradese ba nasaun Vietname ne’ebe promove teleconferensia ho reprezentante ASEAN sira nian ba asuntu ekonomia no sosiu kultural iha tinan kotuk kona-ba nasaun Timor-Leste.
Adalgisa dehan adezaun Timor Leste ba ASEAN nu’udar Prioridade a’as liu iha politika relasaun Estena nasaun ne’e nian.
Ministra ne’e mos agradese ba vietname tan ba bele Esporta ona fo’os ba Timor Leste.
Husi parte Ministru Negosiu estranjeiru Vietname, Minh kontente ho relasaun ne’ebe buras entre rai rua iha impaktu husi Pandemia Covid 19, maibe nia afirma katak Vietname prontu atu apoiu Timor Leste iha area agrikultura, peskas no gas.
Midia online Vietnam Plus mos informa katak, “Vise PM no Ministru Negosiu Estranjeiru husu ba Timor Leste lalais ratifika bilateral trade ne’ebe asina ona iha 2013, asina akordu protesaun investimentu bilateral no seluk fali visa exemption ba ema diplomata ho ema sira ne’e lori pasaporte ofisial nian, Fasilita emprezariu vietname sira ne’e opera ona iha Timor Leste, inklui Vietel Telemor.”
Tuir fontes Tempo Timor dehan Vietname preokupa ho situasaun ne’ebe Telemor nia Diretor hasoru.
“Vietname nia ulun mensiona mos situasaun Telemor nian ba MNEK Timor Leste ne’e signifika sira preokupa,” dehan fontes ida ne’ebe fo hanoin ba Tempo Timor.
Iha Parte seluk estudante Universidade Timor Leste ida ne’ebe foti fakuldade relasaun internasional dehan kestaun ezekusaun mandadu ba director Telemor labele sai obstakulu ba relasaun bilateral nasaun rua rua nune’e mos detensaun ba pesoal Telemor sei labele detein Timor Leste nia adezaun ba ASEAN.
“Ha’u hanoin situasaun rua la hanesan maske sira presiza proteje sira nia emar. Mas kuandu komete krime presiza aplika lei tuir nasaun membru sira,” dehan Josefina Ximenes, estudante UNTL husi relasaun internasional. (*)
