Koordenadór Seguransa Guarda Lorosaé Oleu Pezadu Munisípiu Baukau, Cipriano Hornay Sarmento da Silva, hatete durante tinan rua nia laran hahu hosi tinan 2019 to'o ohin loron trabalador hamutuk 468 ne'e seidauk simu saláriu.

"Ohin ami mai iha Parlamentu Nasionál, ami mai koalia ami-nia direitu ba Prezidente Komisaun E. Ami nu'udar seguransa Guarda Lorosaé iha Oleu Pezadu durante tama ona ba tinan rua governu liuhusi Ministériu Obra Públika (MOP) seidauk selu tanba ne'e mak ami mai hato'o Komisaun E buka dalan hodi bolu atensaun ba MOP para rezolve tiha problema ne'ebe ami hasoru durante tinan rua la simu salariu," Nia informa ba jornalista sira, hafoin halo audiénsia ho Komisaun E, kuarta (13/1).

Nia haktuie, traballadór hirak ne'e selebra kontratu dezde 2011, to'o iha 2019 estadu hakotu sira-nia kontratu, tanba dehan Kompania Guarda mak manán.

"Maibé ami la hatene, ami-nia kompañia mós lahatene, ami-nia membru sira serbisu iha estasaun sira mós ami seidauk hatene, derrepente mak sira dehan imi-nia kontratu para tanba Guarda mak manán," dehan nia.

Nia akresenta, hosi kompañia Guarda Lorosae informa ba sira katak hasai tiha ema.

"Ami durante serbisu hahú hosi 2011 mai to'o 2019 la hetan PHK no iha 2019 husu ami-nia saláriu fulan 7 nian mós sira dehan osan laiha, tanba ne'e ami mantein nafatin la buat ida, ami ezije ami nia direitu ne'e prontu la'o ba oin," tenik nia.

Nia subliña, daudaun ne'e osan iha ona, uluk orsamentu 2020 mak dehan osan laiha no estadu iha de'it osan duodésimu tanbe ne'e muda ba 2021, maibe OJE 2021 nia aprova no promulga ona, entaun mai hato'o iha Komisaun E para buka solusaun.

Hatan ba kestaun ne'e, Prezidente Komisaun E, Deputadu Abel Pires, hatete problema ida ne'e tuan hahú kedas jullu 2019.

Nune'e mós traballadór 468 ne'ebé serbisu iha kompañia Guarda Seguransa Lorosae sira hala'o kna'ar kada sub-estasaun oleu pezadu nian iha teritoriu laran tomak.

Abel dehan, mudansa kontratu iha juñu 2019 kompañia troka tanba ne'e dezde kedas jullu 2019 maske traballadór sira hala'o sira-nia kn'aar maibé sira la simu saláriu.

"Kona ba problema ida ne'e ami hato'o beibeik ona ba iha plenária, relatóriu komisaun E nian ba fiskalizasaun mós hato'o hela deit, infelismente to'o ohin loron ita seidauk resolve," informa Prezidente Komisaun E ne'e.

Prezidente Komisaun E ne'e rekomenda ba MOP solusiona problema ne'e.