Sidadaun kazál Timor oan ida, la'en ho idade 48, feen ho tinan 39, sidadaun nain-rua ne'e asimtomátiku no hafoin teste, rezultadu hatudu sidadaun kazál ne'e, pozitivu tán Covid-19.

Koordenadora Jerál Komisaun Nasionál Covid-19, Odete da Silva Viegas haktuir, sidadaun na'in-rua ne'e hala'o viajen husi Tangerang, Jakarta iha loron 21 fulan dezembru tinan 2020, ho aviaun Garuda Airlines ba Kupang, toba kalan ida iha Hotel Timore.

Nune'e sai husi Kupang, Atambua iha loron 22 fulan dezembru 2020 ho karreta rental, no hela semana ida liu iha Hotel Matahari.

Nia dehan, sira sai husi Atambua mai Motain ho família nia karreta no iha karreta laran, totál ema hamutuk ema-na'in-4 (haat) hamutuk ho kondutór no família, rua seluk fila ba Atambua.

Tanba fronteira Motain taka hela, entaun sidadaun rua refere tama tuir postu polísia UPF iha Badut Mean, no Forsa UPF tula iha karreta lori ba entrega iha kuarentena Motain.

"Sidadaun na'in-rua ne'e agora daudaun kumpri hela kuarentena iha Motain, Batugade. ekipa vijilánsia Sentru Saúde Munisípiu (SSM) Bobonaro hasai ona sira nia Swab-test iha loron 11 Janeiru 2021. Rezultadu teste pozitivu sai iha loron 12 jeneiru 2021", Koordenadora Jerál Komisaun Nasionál Covid-19, Odete da Silva Viegas informa liuhusi konferénsia imprénsa iha Palásiu das Cinzas, Kaikoli, kuarta (13/01).

Nia dehan, pasajeiru sira-ne'ebé kumpri kuarantena iha Motain-Batugede hamutuk ema na'in-22 ne'ebé tama mai área Timor-Leste liuhusi dalan ilegál.(*)