Diretór Ezekutivu Nasional Compac Development Team Timor-Leste (CDT-TL), Constancio da Conceição Pinto hateten, projetu ne'ebé EUA apoia atu halo konstrusaun Agua Saneamentu drainajen no edukasaun iha Timor-Leste.

"Ami hotu tuur hamutuk ko'alia ona prepara oinsa atu bele aselera Compac Development Team ida ne'e ba oin, eh tuir ami nia hakarak ne'e fulan juñu nia laran ita asina ona akordu ho EUA ba apoiu ne'ebé sira fo mai ita," Constancio Pinto hateten lia hirak ne’e hafoin sorumutu ho Ministru Prezidensia Konsellu Ministru Fidelis Leite Magalhães iha palasiu Governu, Tersa (12/01).

Nia akresenta, orsamentu ne'ebé EUA apoia ne'e sei provizóriu, tanba sei halo estudu viabilidade.

"Atu hato'o de'it katak, apoiu ne'ebé sira fó ne'e ba projetu rua, agua saneamentu drainajen nian, no edukasaun ho valor ne'ebe maka entre millaun $275. Karik bele sa'e tan depende ba estudu viabilidade ne'ebé sei hala'o, eh projetu ne'e sei implementa, karik sei asina iha fulan juñu nia laran sei implementa iha tinan ne'e nia laran, eh durasaun ba projetu ne'e tinan 5", nia relata.

Nia afirma, karik pandeima Covid-19 mak laiha Timor-Leste asina tiha ona kontratu ho Estadu Unidus Amerika iha fulan outubru tinan 2020.

"Atividade ne'ebé halo iha kotuk, atu dehan de'it katak, se karik Covid ne'e laiha maka iha fulan outubru ne'e ita asina tiha ona kontratu ho EUA, infelizmente tanba Covid, entaun ami la konsege", nia tenik.
Nia haktuir, iha tinan kotuk (2020) halo maka oinsa kompleta estudu viabilidade ba projetu rua ne’e.

"Ohin loron sira halo hela, hein katak ita bele kompleta estudu viabilidade ba projetu rua ne'e iha tempu badak. Fulan junu nia laran buat hotu la'o diak ita bele atinji, buat ida impedimentu ita maka mobilizasaun teknika sira mai husi rai liur, tanba presiza tekniku sira husi rai liur sira labele halo viajem husi Amerika ka Australia ou husi Europa mai Timor atu bele halo instalasaun ba ekipamentus sira, no halo estudu ba projetu rua ne'e", nai subliña.

Maibé, Constancio mós hanoin katak, iha fatin hotu iha ona vasina inklui Timor Leste, iha tempu badak sei iha, problema ne'e sei ultrapasa hodi tekniku sira mai fali atu hala'o servisu sira ne'ebé presiza kompleta.

Projetu ne'e CDT-TL servisu hamutuk ho Ministeriu relevante hotu inkluindu Ministeriu Obras Publiku (MOP), no Ministeriu Edukasaun atu oinsa dudu projetu ne'e prosesu ba oin.

Nune'e mos CDT halo koordenasaun ho Ministeriu Negosiu Estranjeiru no Koperasaun (MNEK), Ministeriu Finansas (MF), Ministeriu Solidariedade Sosial no Inkluzaun (MSSI), Sekretariu Estadu Igualdade Jeneru, no Ministeriu Agrikultura, Sekretariu Estadu Ambiente nian. (*)