Nia haktuir, Reasaun ne'e, Povu hatudu tanba bainhira atu besik Estadu Emerjénsia remata mosu kazu infesaun foun, maibé la kleur kazu infetadu ne'e rasik derepente sai negativu.
Patrocinio preokupa, tanba bainhira povu lafiar hotu tiha maka derepente mosu duni transmisaun lokál ka covid-19 iha komunidade nia le’et, maka infelismente sei espalla lalais tebes iha teritoriu timor-laran tomak.
Nia haktuir, iha Dekretu-Governu numeru 21/2020 de 30 de dezembru hatu’ur medidas ezekusaun deklarasaun Estadu de Emerjênsia ne'e, atu responde infesaun pozitivu Covid-19 ba Timor-oan sira na’in-hát (4), na’in-3 husi Oe-cusse no na’in-1 iha Díli mai husi Inglatera.
Maibé Medidas ne’ebé Governu implementa iha fulan-Dezembru 2020 no inísiu fulan-Janeiru 2021 hamosu reasaun oin-oin husi Povu tanba limite sidadaun sira atu festeza Tinan Foun no atividade relijioza nian.
"povu La-fiar no mosu dezobedência sosiál ida ne’e tanba Governu de Faktu la onestu bainhira deklara Estadu Emerjénsia, mosu kultura inventa kazu Covid-19, tanba atu besik Estadu Emerjénsia remata mosu kazu infesaun foun, iha loron tuir mai infetadu sira sai negativu tiha," Patrocino fundamenta lia hirak ne'e relasiona ho pedidu debate estadu emerjensia ho governu iha plenáriu PN, Tersa (12/1).
Nia dúvida programa governu nian bainhira estadu emerjensia la'o, Governu mantein fali Programa Cesta Básica (Sesta Bázika) ne’ebé halibur ema rihun ba rihun ne’ebé hatudu ema la kumpre regras hanesan distánsia sosial no medidas Estadu Emerjénsia nian.
"Ho preokupasaun hirak ne'e, maka Bankada CNRT hare’e katak, ezekusaun Estadu Emerjénsia ne’ebé halo husi Governu daualu la kumpre dekretu Prezidensial nian,"nia dehan.
Deputadu ne’e koalia tanba Iha dekretu Prezidensial nian husu atu implementa medida distánsia sosiál ne'ebé rigor hodi limita ema atu halibur malu labele liu na'in 10, maibé realidade Governu de Faktu implementa nafatin programa Sesta Bázika ne'ebé halibur ema barak.
Nune'e nia kestiona, Seráke ho programa sesta bázika ne’ebé la tuir regras Estadu Emerjénsia nian, bele lori populasaun sira livre husi transmisaun Covid-19.
Maski ho situasaun ne'e, maibé Bankada CNRT sei nafatin sujere debate ho Governu, oinsá mak sensibliza Povu hodi kuidadu án nafatin, matan moris no neon na’in atu kumprimenta regras ba prevensaun moras Covid-19.
Hatán ba kestaun ne'e, Vise Primeiru Ministru (PM) no atual Ministru Planeamentu no Ordenamentu (MPO) Jose dos Reis hateten, Governu laiha intensaun atu politiza situasaun covid-19.
Nia hatete desizaun hotu-hotu ne'ebe governu hola ida ne'e tanba atu prevene kazu covid-19 labele tama iha timor-leste.
Tanba ne'e, Laiha ema ida maka iha intensaun, atu politiza covid-19, maibe estadu emerjensia ida ne'e nudar desizaun prevensaun ne'ebe governu inisia hahú husi fulan marsu 2020 to'o agora.(*)
